سووره‌تێ نسا‌ء، مه‌ده‌نی یه و 176 ئایه‌ته.

سووره‌تێ نسا‌ء، مه‌ده‌نی یه و 176 ئایه‌ته.

مقالات مرتبط

 

1- بناڤێ خودایێ ره‌حما وی پر و به‌رفره‌ھـ. خه‌لکینو، خوه ژ بێ ئه‌مری یا خودایێ خوه بپارێزن؛ ئه‌وێ هوون ژ یێک نه‌فسێ چێکرین و جووتا وێ (هه‌ڤژ‌ین) ژی ژ وێ چێکر و ژ وا هه‌ردووکا مێر و ژونێن زحفی [د عه‌ردێ د‌ا] بلاڤ کرن؛ و ته‌قواتی یا وی خودایێ هوون ب [ناڤێ] وی ژ هه‌ڤ دخازن بکن و های ژ مرووڤاتیێ بمینن. براستی خودێ چاڤدێره لسه‌ر هه‌وه.

2- و مالێ یه‌تیما بدن وان و یا [خوه یا] پیس ب یا [وا یا] پاقژ نه‌گوهه‌ر (مالێ خوه‌یێ پیس و خراب شوونا مالێ وا یێ پاک و باش نه‌دن وا) و مالێ وا دگه‌ل مالێ خوه نه‌خون، چکو براستی ئه‌و گونه‌هه‌ک مه‌زنه.

3- ده‌رحه‌ق [مه‌هرکرنا] یه‌تیمادا ئه‌گه‌ر طرسا هه‌وه ژ وێ بێ کو هوون نه‌کاربن عه‌داله‌تێ (دورستاهیێ) راگرن ڤێجا چقا لهه‌وه خوش بێ ژ [دیتر] ژنا لخوه مه‌هرکن، دوو دوو، سێسێ، چارچار. لێ ئه‌گه‌ر هوون ژ نه‌دورستی یێ طرسهان، ڤێجا یێک ته‌نێ، ئان ئه‌و جائێرێن هه‌وه [به‌سه ژ هه‌وه‌ره]. ئه‌ڤاهه (= نه‌ئانینا چه‌ند ژنا) نێزیکتره ژ وێ چه‌ندێ را کو هوون نه‌که‌ڤن سته‌مێ (= زولمێ. عیالمه ندی یا بێهووده).

4- و مه‌هرا ژنا ب دلخوه‌شی بدن وا، ڤێجا ئه‌گه‌ر سه‌ر دلێ خوه تشته‌ک ژ وێ ژ هه‌وه‌را هێلان، هنگێ هوون ژی بخون، حه‌لال و نووشێجان بێ.

5- و مالێ خوه کو خودێ ژ هه‌وه‌ره کریه وه‌سیلا خوه راگریێ [د ژیانێدا] نه‌دن سه‌فێکا (مرووڤێن عه‌قل سڤک). و [لێ] خارنا وا ژ وێ بدن و جلکێ وا بدن و ب خوه‌ش گووتنێ (= ب جامێری) گه‌ل وا باخڤن.

6- و یه‌تیما بجه‌ربینن حه‌تا دگهێن [ده‌مێ] زه‌واجێ، ڤێجا ئه‌گه‌ر هه‌وه دورستی [یا فکری و عه‌قلی] د وادا د‌یت، هنگێ مالێ وا بدن وان و زێده‌گاڤیێ نه‌کن و ب له‌ز نه‌که‌ڤن ژ خارنا وێرا ژ به‌ری مه‌زنبوونا وان. و که‌سێ مالدار بلا دلێ خوه نه‌بتێ (حه‌قێ خویتیکرنا خوه ژێ رانه‌کێ)، و که‌سێ فه‌قیر بێ بلا گووره‌کی عه‌ده‌تێ (ژ وێ) بخوێ. ڤێجا ده‌ما هه‌وه مالێ وان ل وان زڤراند، شاهدا لسه‌ر وا بگرن. و خودێ ژ حه‌سابێ را به‌سه.

7- ژبوونا مێرا به‌هره‌ک هه‌یه د وێ یا باب و دایکێ و ئه‌قربا پاش خوه‌ڤه هشتین (بویی میرات)، و ژ ژنارا ژی به‌هره‌کھه‌یه ژ وێ یا دایک و باب و فامیلان (ئه‌قربا) پاش خوه‌ڤه‌ ھشتین. [ئه‌و مالێ پاش واڤه مایی] چ کێم بێ چ گه‌له‌ک، به‌هر، ڤه‌بریی یه.

8- و ده‌ما ئه‌قربا و یه‌تیم و ژار لبال ته‌قسیمێ حازر بین، ڤێجا [هنه‌کی] ژ وێ بدن وان و ب جامێری گه‌ل وا خه‌به‌ر بدن.

9- و که‌سێن کو ئه‌گه‌ر [بمران و] زارووکێن بێچاره پاشخوه‌ڤه بھشتان وێ ژ به‌ر وان د‌ ترسێد‌ا بوونا، بلا بترسن (ژ زولما ل یه‌تیمێن خه‌لخێ ژی). ڤێجا بلا ژ خودێ بطرسن و گوتنه‌ک بنه‌جی بێژن.

10- راستی ئه‌ڤه کو: که‌سێن مالێ یه‌تیما ب زولمی دخون، هه‌ما ئه‌و ئاگره‌کی دكن زکێ خوه‌دا. و ئه‌و وێ بکه‌ڤن ناڤ ئاگرێ شاراندی دا.

11- خودێ ده‌رحه‌ق زارووکێن هه‌وه‌دا وه‌سیه‌تێ لهه‌وه دکێ: به‌هرا کور وه‌ک به‌هرا دو که‌چا یه، و ئه‌گه‌ر [میراتبه‌ر هه‌می] که‌چ [و] سه‌ر دووا را بن، به‌هرا وا دووسێکا میراتێ یه، و ئه‌گه‌ر یێک که‌چ تنێ بێ [کومیراتێ دبێ] ڤێجا نیڤی یا وێیه (ژ میراتێ)؛ و ژ هه‌ر یێک ژ دایک و با بێن وی [یێ مری] را شه‌شیێکه، ئه‌ڤ هنگێ یه کو [یێ مری] زارووکه‌ک هه‌بێ. لێ ڤێجا ئه‌گه‌ر زارووک تنه‌بن و [تنێ] باب و دایک میراتبه‌رێ وی بن‌، ژ دایکێ را سێیێکه [و یا مایی دگهێ باب]؛ ‌و ئه‌گه‌ر ئه‌وی برا هه‌بن شه‌شیێک دگهێ دایکێ ئه‌ڤ هه‌می پشتی وێ وه‌صیه‌تێ یه کو وه‌صیه‌ت کری ئان [دانا] ده‌ینێ لسه‌ر هه‌یی یه. هوون نزانن کێژ یێک ژ بابێن هه‌وه ئان زارووکێن هه‌وه ژ هه‌وه‌را ب فه‌یده‌تره. [ ئه‌ڤ] فه‌رزه‌که ژ ئالیێ خودێڤه. براستی خودێ زانایێ شه‌هره‌زایه.

12- و نیڤه‌ک ژ میراتا ژنێن هه‌وه ژ هه‌وه‌رایه ئه‌گه‌ر ئه‌وا زارووک نه‌بن، و ئه‌گه‌ر زارووک هه‌بن چاریێکا میراتێ یا هه‌وه یه‌، [ئه‌لبه‌ت] پشتی وه‌صیه‌تا کرین ئان ده‌ین [کو لازمه بێ دایین]؛ و چاریێکا میراتا هه‌وه یا وایه ئه‌گه‌ر هه‌وه زارووک نه‌بن، و ئه‌گه‌ر هه‌وه زارووک هه‌بن حه‌شتیێکا میراتا هه‌وه ژ وانرا یه، [ئه‌لبه‌ت] پشتی وه‌صیه‌تا کو وه‌صیه‌ت کری ئان ده‌ین [کو ‌گه‌ره‌که بێ دایین]. و ئه‌گه‌ر مێر ئان ژنا کو میراتێ ژێ دبن، که‌لاله [= بێزارووک و بێ دایک و باب] بێ و برا ئان خویشک هه‌بێ ڤێجا ژبوونا هه‌ر یێک ژ وان دووا شه‌شیێکا میراتێ یه، و ئه‌گه‌ر ئه‌و زێده‌تربن د سێیێکێ [میراتێ] دا شریکن [هه‌لبه‌ت] پشتی بجی ئانینا وه‌صیه‌تا کری و ده‌ین کو بێ زیان بێ [ژ وارسا را]. ئه‌ڤه شیره‌تا خودێ، و خودێ زانایی بێهن فره‌ھه.

13- ئه‌ڤێنهه سینوورێن (حوکمێن) ئلاهی نه، و که‌سێ گوهدار بێ ژ خودا و پێغه‌مبه‌رێ ویرا، وێ وی بێخێ د وا بهشتا دا کو رووبار د بنرا دهه‌رکن و ئه‌و هه‌ر وێ تێدابن و ئه‌ڤاهه‌یه سه‌رکه‌تنا مه‌زن.

14- و که‌سێ نه‌گوهداری یا خودێ و پێغه‌مبه‌رێ وی بکێ و ژ حودوودێن (سینوور) وێ ببوورێ، وێ ئه‌وی بێخێ د ئاگره‌کیدا کو هه‌ر تێدا دمینێ. و ژ ویرایه عه‌زابه‌ک سه‌رشوورکه‌ر (رزیلکه‌ر - شه‌رمه‌زارکه‌ر).

15- و ژ ژنێن هه‌وه، ئه‌وێن دکه‌ڤن پیساتی یێ (زنایێ) چار که‌سا ژ خوه [موسلمانا] سه‌ر وان بکن شاهد، ڤێجا ئه‌گه‌ر شاهدی دان، ئه‌وا [= ژنا] د خانیاده راگرن. حه‌تا مرنا وا بگهێ ئان خودێ ژ وانرا رێکه‌کی ده‌ینێ.

16- و ژناڤ هه‌وه، ئه‌و دوزه‌لامێن پیساتی یێ گه‌ل هه‌ڤدوو دکن (مێرگه‌ل مێرا) ئه‌وا بئێشینن، ڤێجا ئه‌گه‌ر ته‌وبه‌ کرن و دورست بین ده‌ستا ژ وا بکێشن، چکو براستی خودێ ته‌وبه قه‌بوولکه‌رێ بره‌حمه.

17- ته‌وبه، لبال خودێ، تنێ ژ وا که‌سا را یه کو ب نه‌زانین خرابیێ دکن، پاشێ ژ نێزیکڤه لخوه دزڤرن (ته‌وبه دکن)، ڤێجا ئه‌ون کو خودێ ته‌وبا وا قه‌بوول دکێ، و خودێ پر زانایێ شه‌هره‌زایه.

18- و ته‌وبا که‌سێن گونه‌ها دکن، حه‌تا وه‌ختێ کو مرنا یێک ژ وان دگهێ، دبێژێ: «نها ڤێگاڤێ من ته‌وبه یه» نه قه‌بووله، و [هه‌ر وها] که‌سێن لسه‌ر حالێ کوفرێ ژی دمرن [ته‌وبا وا نه‌قه‌بووله] ئه‌ون کو مه ژ وانرا عه‌زابه‌ک ب ئێش حازر کریه.

19- ئه‌ی گه‌لی که‌سێن هه‌وه ئیمان ئانیی، ژ هه‌وه‌را نه حه‌لاله کو ب کووته‌کی هوون خوه بکن وارسێ ژنا؛ و طه‌نگی یێ ژ وانرا چێنه‌کن دا هوون هنه‌کی ژ وێ یا هه‌وه دایی وان ژ خوه‌ره ‌ببن، خێنجی کو که‌تبن ناڤ پیساتیه‌ک ئه‌شکه‌ره ره؛ و ب جامێری گه‌ل وا بژین. ڤێجا ئه‌گه‌ر نه ب دلێ هه‌وه بین (هوون ژ وا حه‌زنه‌کن)، چێدبێ کو هوون ژ تشته‌کی حه‌ز نه‌کن، لێ خودێ باشیه‌ک زه‌حفی د وێدا ده‌ینێ.

20- و ئه‌گه‌ر هه‌وه‌ ڤیا هوون هه‌ڤژینه‌ک [دی] بینن شوونا ژنا خوه [یا پێشدا]، و هه‌وه ماله‌ک زه‌حفی دابێ یێک ژ وان، تشته‌کی ژ وێ نه‌گرن؛ ما هوونێ وێ (مال) ب بێ به‌ختی و گونه‌هه‌ک ئه‌شکه‌ره بگرن؟

21- و چه‌وا هوونێ وێ (مه‌هر و مالێ دایی ژنا) بگرن حالحاله هه‌وه ژ هه‌ڤدوو خوه‌شی دیتیه و ئه‌وا (ژنا) ژ هه‌وه سووزه‌ک قه‌وی گرتیه؟

22- و نه‌زه‌وجن گه‌ل وایێن بابێن هه‌وه مه‌هرا وا ژ خوه‌را کرین، خێنجی یا ده‌رباز بوویێ، راستی ئه‌ڤه کو ئه‌و [کار] قه‌باحه‌ت (پیساتی) و دوژمنی و پیس رێکه.

23- [زه‌واجا ڤا] حه‌رام بویه لسه‌ر هه‌وه: دایکێن هه‌وه که‌چێن هه‌وه و خوشکێن هه‌وه و مه‌تێن هه‌وه و خاله‌تێن هه‌وه و که‌چێن برا و که‌چێن خوشکێ و دایکێن هه‌وه و نه‌ڤسیێن هه‌وه (زارووکێن ژنێ ژ مێره‌ک دی) ئه‌وێن ل مالێن هه‌وه‌دا ژ ژنێن هه‌وه یێن هه‌وه تێکه‌لیا وا کری، ڤێجا ئه‌گه‌ر هه‌وه تێکه‌لیا ژنمێرکی گه‌ل وا نه‌کربێ، هنگێ چ گونه‌ھ سه‌ر هه‌وه نینه (ژ به‌ر ل خوه مه‌هرکرنا که‌چا وان)؛ و حه‌لالێن (ژنێن) کورێن هه‌وه یێن ژ پشتا هه‌وه، و کووم کرنا دو خوهکا (خوشکا) دگه‌ل هه‌ڤ، خێنجی ژ وێ یا ده‌رباز بوویی (پێشیا هاتنا ئسلامێ)، راستی ئه‌ڤه کو خودێ لێبوور و بره‌حمه؛

جزووك/٥

24- و ژنێن مێر هه‌یی (ژی ژ هه‌وه‌ره‌ حه‌رامن) خێنجی ژنێن کو هوون بویین مالکێ وان؛ [ ئه‌ڤ] بریارا خودێیه لسه‌ر هه‌وه هاتیه نڤیسین. و خێنجی ژ وان [كو هاتن گووتن] ژ هه‌وه‌ره هاتنه حه‌لال کرن کو هوون ب مالێ خوه ئه‌وا بخازن د حاله‌کیدا کو هوون پاک داو بن، نه زناکار. نخوه ئه‌وا هه‌وه موتعه کر [له‌ززه‌ت و به‌هره‌یه‌ک ژێ هلدا] ڤێجا کرها وا ب ڤه‌بر بدن وان، و چ گونه‌ھ لسه‌ر وه نینه ژ به‌ر وێ یا هوون پێ رازی بن پشتی ڤه‌برینێ. براستی خودێ پر زانایێ شه‌هره‌زایه.

25- و ڤێجا که‌سێ ژ هه‌وه، ژێ نه‌یێ کوگه‌ل ژنێن ئازاد و باوه‌ردار بزه‌وجێ، ئه‌ڤه که‌چێن جوانێن خوه‌ی ئیمان کوهوون مالکێ وانه [بلا گه‌ل وا بزه‌وجن]. و خود‌ێ زاناتره‌ ب ئیمانا ھه‌وه‌، ھون ژ ھه‌ڤد‌وونه‌، ڤێجا ب ئزنا خوه‌یێن وان ئه‌وا لخوه مه‌هر بکن و مه‌هرا وان ب جامێری بدن وان [ب شه‌رتێ کو] پاک داو بن نه زناکار و یارکێن خه‌ف ژی نه‌بن. ڤێجا ده‌ما بین خودان مێر ئه‌گه‌ر پیساتیه‌ک نامووسی کرن، نیڤێ ئیزا یا ژنێن ئازاد ژ وانرا هه‌یه. ژناڤ هه‌وه ئه‌ڤاهه ژ وی که‌سی را یه کو ژ که‌تنا ناڤ گونه‌ھ طرسابێ. و ئه‌گه‌ر هوون خوه راگرن ژ هه‌وه‌ره باشتره. و خودێ لێبوور و پر بره‌حمه.

26- خودێ دخازێ ژ هه‌وه‌را ئه‌شکه‌ره بکێ و رێبازا که‌سێن پێشیا هه‌وه‌دا نیشا هه‌وه بکێ و ته‌وبا هه‌وه قه‌بوول بکێ. و خودێ پر زانا و شه‌هره‌زایه.

27- و خودێ لخوه زڤرینێ [ژ نه‌باشیا] ژ هه‌وه‌ره دخازێ و که‌سێن لپه‌ی خوه‌ستێن نه‌فسانی دخازن هون خوه‌هر ببن ب خوهربوونه‌ک مه‌زن.

28- خودێ بارسڤکیێ ژ هه‌وه دخازێ؛ و [زانێ] مرووڤ بێ تاقه‌ت هاتیه چێکرن.

29- گه‌لی كه‌سێن هه‌وه ئیمان ئانیی، مالێ هه‌ڤدو ب نه‌هه‌قی نه‌خون، تجاره‌ته‌ک کو ب رازی بوونا هه‌وه بێ ژێ ده‌ر. و خوه نه‌کوژن، براستی خودێ ژ هه‌وه‌را پر بره‌حمه.

30- و که‌سێ ئه‌وێ بکێ ب زێده‌گاڤی و زولم، ڤێجا ئه‌مێ وی باڤێژن ناڤ ئاگر، و ئه‌و ژ خودێرا هێسانه (رحه‌ته).

31- ئه‌گه‌ر هوون خوه ژ گونه‌هێن مه‌زن کو نه‌هیا هه‌وه ژێ هاتیه کرن بدین پاش ئه‌مێ ژ هه‌وه‌را ل خرابی یێن هه‌وه ببوورین و هه‌وه بێخین د جهه‌ک هێژاییڤه.

32- نه‌وه‌بێ هوون خوه‌زیا وا تشتا بخازین کو خودێ پێ وا زێداهی ژ هنه‌کارا چێکری لسه‌ر هنه‌کا. ژ مێرا را به‌هره‌ک هه‌یه ژ وێ یا بده‌ست خوه‌ڤه ئانیین؛ ژبوونا ژنا ژی به‌هره‌ک هه‌یه ژ وێ یا بده‌ست خوه‌ڤه ئانیین. و بخازن ژ که‌ره‌ما خودێ، براستی خودێ ب هه‌می تشتی زانایه.

33- و ژهه‌ر یێکی را (چ ژن چ مێر) مه وارس دانینه ژبوونا وێ یا دێ و باب و ئه‌قربا (فامیل - مرووڤێن مرووڤ) و که‌سێن هه‌وه سووز گه‌ل وا هه‌یی پاش خوه‌ڤه هشتین، ڤێجا به‌هرا وا بدن وا. براستی خودێ شاهده لسه‌ر هه‌ر تشتی.

34- زه‌لام مالخوێ ژنانه، ژ به‌ر کو خودێ زێداهێ دایه هنه‌کا لسه‌ر هنه‌کا، و ژ به‌ر کو ژ مالێ خوه دانه (ل وا مه‌زخاندنه). ڤێجا ژنێن قه‌نج گوهدارن و ب پارازتنا خودێ پارێزه‌رێ ڤه‌شارتیێنه (خه‌فێن مالێ و مالخوێ خوه ئه‌شکه‌ره ناکن). و ئه‌و ژنێن هوون ژ نه‌گوهداری یا وا دترسن [جارا ئه‌ول] ئه‌وا شیره‌ت بکن و [د په‌یرا] د جهێ رازانا وادا خوه دوور بگرن ژ وا و [ئه‌گه‌ر ڤێ ژی فه‌یده نه‌کر] ل وا بدن، ڤێجا ئه‌گه‌ر گوهدارێ هه‌وه بین ئێدی ل چ رێکا نه‌گه‌رن [بو لوومه کرنێ]. براستی خودێ بلندێ مه‌زنه.

35- و ئه‌گه‌ر هوون د ناڤبه‌ینا وا دا (ژن و مێر) ژ جداهی یێ طرسان، ڤێجا هوون حوکمده‌ره‌کی (دادوه‌ر - حه‌که‌م) ژ مرووڤێن وی و حوکمده‌ره‌کی ژ مرووڤێن وێ [ژبوونا قراردانێ] راکن؛ ئه‌گه‌ر ئه‌وا دورستبون بڤێ، وێ خودێ لهه‌ڤهاتنێ بێخێ د ناڤبه‌ینا وادا. براستی خودێ زانایێ ئاگه‌هداره.

36- و به‌نده‌تی یا خودێ بکن و قه‌ت چ شریکا ژیرا چێنه‌کن؛ و قه‌نجی یێ دگه‌ل دێ و بابا و دگه‌ل مرووڤێن خوه و یه‌تیما و به‌له‌نگازا و جیرانێ مرووڤانی هه‌یی (فامیل) و جیرانێ خه‌ریب و هه‌ڤالێ بره‌خ هه‌وه‌ڤه و رێونگی و ئه‌وێن بنده‌ستێ هه‌وه. راستی ئه‌ڤه کو خودێ حه‌ژ مل هه‌ژێنێ خوه مه‌زنکه‌ر ناکێ؛

37- هه‌ما ئه‌وێن به‌خیله‌تی یێ (قه‌لسیێ) دکن و ده‌ستوورا به‌خیله‌تی یێ ددن خه‌لکێ؛ و ئه‌وا خودێ ب که‌ره‌ما خوه ‌دایی وان ڤه‌دشێرن (کتمان دکن). و مه ژ ئنکارکه‌رارا عه‌زابه‌ک رزیلکه‌ر حازر کریه؛

38- و ئه‌وێن مالێ خوه‌ ددن ژ نیشاندانا خه‌لکێرا و نه ‌باوه‌ریێ تینن ب خودێ و نه ژی ب رووژا ئاخره‌تێ، و که‌سێ شه‌یطان هه‌ڤالێ وی بێ، ڤێجا چ پیس هه‌ڤاله.

39- و ئه‌گه‌ر باوه‌ری ئانیبوونا ب خودێ و رووژا ئاخره‌تێ، و ژ وێ یا خودێ دایی وان بدان، وێ چ زه‌ره‌ر بگھا وان؟ و خودێ باش زانایه ب [حالێ] وان.

40- راستی ئه‌ڤه کو خودێ قاسی زه‌‌رره‌یه‌کی زولمێ ناکێ، و ئه‌گه‌ر [ئه‌و زه‌ررا بچووک ڤێجا ] قه‌نجی بی ئه‌وێ دو به‌رابه‌ر د‌کێ، و ژ ئالیێ خوه‌ڤه خێره‌ک مه‌زن ددێ.

41- ڤێجا وێ چه‌وابێ (حالێ وا) ده‌ما ئه‌م ژ هه‌ر ئوممه‌ته‌کی شاهده‌کی بێنین و ته‌ژی ل سه‌ر وا بكین شاهد؟

42- وێ رووژێ که‌سێن ئنکارکرین و نه‌گوهداری یا پێغه‌مبه‌ر کرین، خوزیێ دخازن کوخوه‌زی: دگه‌ل عه‌ردێ راست ببینا. و نکارن قه ‌چ گووتنه‌کی ژ خودێ ڤه‌شێرن.

43- ئه‌ی گه‌لی که‌سێن هه‌وه باوه‌ری ئانیی، د حالێ سه‌رخوه‌شیێ دا نێزیکێ نمێژێ نه‌بن، حه‌تا وه‌ختێ هوون بزانن کانێ هوون چ دبێژن؛ و دحالێ جه‌نابه‌تێ دا ژی [نه‌که‌ڤن نمێژێ] حه‌تا هوون خوه‌ بشوون، ئللا کو هون رێونگی بن. و ئه‌گه‌ر هون نه‌خوش بن ئان سه‌فه‌ری بن ئان یێک ژ هه‌وه ژ ده‌ستاڤێ هاتبێ ئان هوون تێکه‌ل ژنا بیبن، ڤێجا هه‌وه ئاڤ په‌یدا نه‌کربێ، هنگێ ب ئاخه‌ک پاک ته‌یه‌مموم بگرن؛ و [ده‌ستێن خوه] ب رووی و ده‌ستێن خوه‌ڤه بینن. براستی خودێ عه‌فووکه‌رێ لێبووره.

44- ما تو نانێری ل وایێن به‌هره‌ک ژ کتێبێ ده‌س وا که‌تی؟ ل رێوندابوونێ دکرن و دخازن هوون ژی ل رێ و نداببن.

45- و خودێ ب [حالێ] دوژمنێ هه‌وه زاناتره. و هه‌ر خودێ [بو هه‌وه] ژ مه‌زناهی یێ را به‌سه؛ و به‌سه خودێ ئاریکار بێ.

46.- ژ جهویا هه‌نه‌ کو که‌لیما ژ جیی وا ده‌رتینن (دگوهه‌رن – دگوهێزن) و دبێژن [ته]: مه بهیست و نه‌گوهداری کر، و ببهیزه خوه‌زکا تو که‌ر ببیای و پێ پێچانا زمانێ خوه [ب له‌هجا عبری] دبێژن: «راعنا» (د عه‌ره‌بیدا یانی: های ژ مه ‌هه‌به، و د عبریدا یانی: پیسه‌کێ مه) و ده‌ربێ ل دین ددن. راستی ئه‌ڤه ئه‌گه‌ر ئه‌وا بگووتا: مه بهیست و گوهداری کر؛ و ببهیزه؛ و های ژ مه هه‌‌به (أنظرنا) بێ شک وێ ژ وانرا باشتر و بجی‌تر بویا، و لێبه‌لێ خودێ ژ به‌ر ئنکارا وا له‌عنه‌ت ل وان کر، ڤێجا خێنجی ژ کێمه‌كا ئیمانێ ناینن.

47- گه‌لی که‌سێن کتاب ژ هه‌وه‌را هاتی، باوه‌ریێ بینن ب وێ یا مه رێکری (قورئان) کو پشته‌ڤانه ژبوو وێ یا دگه‌ل هه‌وه (کتێبا عه‌سمانی یا هه‌وه)، پێشیا وێ چه‌ندێ کو ئه‌م هنه‌ک رویا ژ ناڤ ببین (بپه‌رچقێنین) ڤێجا ئه‌‌وا پاشڤه بزڤرێنین [قه‌هقه‌رایێ]، ئان ئه‌م له‌عنه‌تێ ل وا بکین، چه‌وا کو مه له‌عنه‌ت ل «ئه‌صحابێ سه‌بت» کری، و ده‌ستوورا خودێ ئلله‌هـ پێک هاتیه.

48- موحه‌قه‌ق خودێ لێ نابوورێ کو شریک ژێرا بین چێکرن، و خێنجی وێ دبوورێ ل وی که‌سێ ئه‌و بخازێ. و که‌سێ شریکا (هه‌ڤپشک) ژ خودێ را چێکێ، ڤێجا بیه‌قین ئه‌وی ب بێ به‌ختی گونه‌هه‌ک مه‌زن کریه.

49- ما گه‌لوو تو نانێری وایێن خوه پاک دکن (په‌صنێن خوه ددن)؟ نه، به‌لکی خودایه کو پاک دکێ یێ ئه‌و بخازێ، و قاسی فتیله‌کی (تاکێ د جووکا به‌رکێ خورمێ دا) ژی زولم ل وا نایێ کرن.

50- بنێره چه‌وا ب بێ به‌ختمی ده‌ره‌وا لسه‌ر خودێ چێدکن، و هه‌ر ئه‌و به‌سه کو گونه‌هه‌ک ئه‌شکه‌ره بێ.

51- ما تو نانێری وایێن خوه‌ی به‌هر بوویین ژ کتێبێ؟ کو باوه‌ری هه‌نه ب « پووت» و «زووردارێن زالم» و دبێژن وایێن که‌تین کوفرێ: ئه‌ڤێنهه ‌رێباز دورستترن ژ وا که‌سێن ئیمان ئانیین.

52- ئه‌و ئه‌ون یێن خودێ له‌عنه‌ت ل وان کری، و ڤێجا که‌سێ خودێ له‌عنه‌ت لێ کر، تو قه‌ت ئاریکا را ژ وانرا نابینی.

53- یان گه‌لوو ب ده‌ستێ وایه هنه‌ک ژ پادشاهی یێ؟ ڤێجا [ئه‌گه‌ر وه بیا] هنگێ قاس چالکا لسه‌ر پشتا به‌رکێ قه‌سپێ ژی نه‌ددان خه‌لکێ.

54- یان ئه‌و حه‌سوود‌به‌رێن خه‌لکێنه ژ به‌ر که‌ره‌ما خودێ دایی وان؟ ڤێجا موحه‌قه‌ق مه کتێب و شه‌هره‌زایی دایه ئالێ ئبراهیم و مه پادشاهیه‌ک مه‌زن دا وان.

55- ڤێجا ژ وا هه‌بین که‌سێن باوه‌ری پێ ئانین و هه‌بین ژ وا کو خوه ژێ دان پاش. و جه‌هنه‌ما شاراندی به‌سه [ژ وانرا].

56- براستی که‌سێن ئنکارا ئایه‌تێن مه کرین، ئه‌مێ وا باڤێژن ناڤ ئاگردا، چڤاس کو بێن چه‌رم کرن (ژ به‌ر سووتنێ) ئه‌مێ شوونا وێدا چه‌رمه‌ک دی ده‌ینین، داکو عه‌زابێ بکێشن. براستی خودێ خوررتێ شه‌هره‌زایه.

57- و یێن ئیمان ئانیین و دورستکاری کرین، ئه‌مێ وا ببین ژوورڤه‌یێ وا بهشتێن رووبار بنرا دهه‌رکنڤه‌، ئه‌و هه‌ر د‌ وێدا دمینن؛ د وێدا ژبوونا وان هه‌ڤژینێن پاک و پاقژ هه‌نه؛ و ئه‌مێ وا بکین بن سیبه‌رێن به‌رده‌وامڤه.

58- براستی خودێ‌ده‌ستوورێ ددێ هه‌وه کو هوون ئه‌مانه‌تا ل خوه‌یێ وا بزڤرینن، و ده‌ما هوون د ناڤ خه‌لکێ حوکم ددن (داوه‌ری دکن) هوون ب عداله‌ت (دورست) حوکم بدن. هه‌ما راستی چ خوه‌ش تشته ‌کو خودێ پێ وێ شیره‌تێ لهه‌وه دکێ. براستی خودێ بھیسه‌رێ بینایه.

59- ئه‌ی گه‌لی که‌سێن هه‌وه ئیمان ئانیی، گوهدارێ خودێ بن و گوهدارێ پێغه‌مبه‌ر و کاربده‌ستێن ژ خوه. ڤێجا ئه‌گه‌ر هه‌وه د تشته‌کی‌دا كر خره‌جر، ئه‌وێ ڤه‌گێرن بال [کتێبا] خودێ و [سوننه‌تا] پێغه‌مبه‌ر، ئه‌گه‌ر هه‌وه باوه‌ری ب خودێ و رووژا ئاخره‌تێ هه‌یه؛ ئه‌ڤاهه باشتره و دووماهیکاوێ خوه‌شتر.

60- گه‌لوو ته نه‌نێریه وا که‌سێن گومان دکن کو هه‌ما براستی باوه‌ری ئانینه ب وێ یا ژ ته‌را هاتی و وێ یا پێشیاته دا هاتی خارێ [دیسا ژی] دخازن حوکم دانا د ناڤ خوه دا ببن بال طاغووت (زووردارا)، حالحاله بیه‌قین ده‌ستوورا ژ وانرا هاتی ئه‌وه کوئنکارا وی بکن، و شه‌یطان دخازێ ئه‌وا بێخێ د رێ وندابینه‌ک دویرو درێژدا.

61- و ده‌ما ژ وانرا بێ گووتن ب ئالیێ وێ یا خودێ رێکری و ب ئالیێ پێغه‌مبه‌رڤه وه‌رن، تو منافقا دبینی کو گه‌له‌ک دژوار خوه ژ ته ددن پاش.

62- ڤێجا چه‌وانه، ده‌ما ژ به‌ر کریارێن خوه ‌یێن پێشدا به‌لایه‌ک سه‌ر وادا بێ، پشتی وێ بێن بال ته، ب خودێ صووند دخون کو مه ژ قه‌نجی و رێککه‌تنێ پێڤه تشته‌ک دی نه‌خوه‌ستیه؟

63- ئه‌ڤ هه‌ما ئه‌ون کو خودێ یا دلێ وا زانێ، ڤێجا تو ده‌ڤ ژ وا به‌رده، و شیره‌تا ل وا بکه و گووتنه‌کی ژ وانرا بێژه کو بگهێ کووراتی یا دلێ وا.

64- و مه چ یێک ژ پێغه‌مبه‌را رێنه‌کریه ئللا کو ب ده‌ستوورا خودێ گوهداری یا وی بێ‌کرن. و ئه‌گه‌ر ده‌ما ئه‌وا زولم ل خوه کرین بهاتان بال ته و داخازا لێبوورینێ ژ خودێ بکران و پێغه‌مبه‌ر ژی ژ وانرا داخازا لێبوورینێ بکرا، موحه‌قه‌ق وێ بدیتان کو خودێ ته‌وبه قه‌بوولکه‌ر و پر بره‌حمه.

65- ڤێجا نه‌وه‌یه، ئه‌ز ب خودایێ‌ته‌کم، ئه‌و ئیمانێ ناینن حه‌تا نه ئه‌وبێ کو ته بکن حه‌که‌م (داوه‌ر) د وێ یا د ناڤبه‌ینا وادا جره کێش لسه‌ر هه‌یی، د په‌یرا ژی ده‌رحه‌ق [دورستیا] وێ یا ته حوکم پێ دایی د دلێ خوه دا نه‌کڤن ه‌حمه‌تێ و ته‌سلیمێ ته‌سلیم ببن.

66- و ئه‌گه‌ر مه لسه‌ر وا نڤیسیبا کو خوه بکوژن ئان ژ وه‌لاتێ خوه ده‌رکه‌ڤن، خێنجی کێمه‌ک ژ وا ئه‌و نه‌دکران. و ئه‌گه‌ر ئه‌وا تشتاب وێ شیره‌ت ل وا هاتی کرن پێک بانیان، بیه‌قین وێ ژ وانرا باشتر بویا و ژ خوه‌راگریا وارا بجی‌تر (مه‌زبووتتر)؛

67- هنگێ موحه‌قه‌ق مه ‌ژی وێ ژ ئالیێ خوه‌ڤه کرهه‌ک مه‌زن بدا وان.

68- و موحه‌قه‌ق مه وێ ئه‌و بێخستان سه‌ر رێکا راست.

69- و که‌سێ گوهداری یا خودێ و پێغه‌مبه‌ر بکێ: ڤێجا ئه‌و دگه‌ل وا که‌سانه یێن خودێ نعمه‌ت ل وا کری، ژ: پێغه‌مبه‌ران و راستگووان و شه‌هیدان و دورستکاران، و ئه‌و چ خوه‌ش ھه‌ڤالن.

70- ئه‌ڤاھه‌یه‌ كه‌ره‌ما خودێ، و خودا به‌سه ژ زانینێ را.

71- ئه‌ی که‌سێن هه‌وه باوه‌ری ئانیی، حازریا خوه بکن [چه‌کێ خوه وه‌رگرن] ڤێجا کووم و کوم [ژ جهادێ را] ده‌رکه‌ڤن، ئانژی پێکڤه بکه‌ڤن رێ.

72- و راستی ئه‌ڤه کو موحه‌قه‌ق ژ ناڤ هه‌وه ‌هه‌یه که‌سێ خوه گران (گیروو - سست) دکێ؛ ڤێجا ئه‌گه‌ر نه‌خوه‌شییه‌ک ‌سه‌ر هه‌وه دا هات، دبێژێ: بیه‌قین خودێ قه‌نجی لمن کریه کو ئه‌ز دگه‌ل وا حازر نه‌بوومه.

73- و بێ شك ئه‌گه‌ر زێد‌اھیه‌ك (فه‌ید‌ه‌) ژ خود‌ێ كه‌ت د‌ه‌ستێ ھه‌وه‌ حه‌چوه‌كوو قه‌ت حه‌زكرن د‌ ناڤبه‌ینا ھه‌وه‌ و واد‌ا نه‌یی، موحه‌قه‌ق وێ بێژن: خوه‌زكا ئه‌ز گه‌ل وا بووما، ڤێجا ئه‌ز ب سه‌ركه‌تنه‌ك مه‌زن سه‌ر بكه‌تام.

74- ڤێجا ئه‌وێن ژ به‌ر [ده‌ستڤه ئانینا] ئاخره‌تێڤه‌ ژیانا دونیایێ دفرووشن، بلا د رێکا خودێ دا بکه‌ڤن شه‌ر؛ و که‌سێ د رێکا خودێدا شه‌ر بکێ، ڤێجا بێ کوشتن ئان سه‌ر بکه‌ڤێ، د په‌یرا ئه‌مێ خیره‌ک مه‌زن بدنێ.

75- چبیه ژ هه‌وه کو هوون د رێکا خودێ و [خلاس کرنا] وایێن هاتین ژارکرندا ژ مێر و ژن و زارووکان، شه‌ر ناکین؟ ئه‌وێن کو دبێژن: ئه‌ی خویکه‌رێ مه، مه ده‌رێخه ژ ڤی باژارێ خه‌لکێ وێ زالم (مه‌که‌هێ) و ژ ئالیێ خوه‌ڤه مه‌زنه‌کی ژ مه‌را ده‌ینه و ژ ئالیێ خوه‌‌ڤه ئاریکاره‌کی بده مه.

76- که‌سێن ئیمان ئانیین د رێکا خودێ دا شته‌ر دکن، و یێن ئنکار کرین د رێکا نه‌حه‌قێن زێده‌گاڤدا (طاغووت) شه‌ر دکن، ڤێجا دگه‌ل هه‌ڤالێن شه‌یطان شه‌ر بکن، براستی حیله‌پیلێن شه‌یطان بێ پشته‌که (زه‌عێف- لاواز).

77- ما ته نه‌نێریه ل وا که‌سێن ژ وانرا هاتی گووتن: [نها] ده‌ستا [ژ شه‌ر] بکێشن، و نمێژێ بجی بینن و زه‌کاتێ بدن، ڤێجا ده‌ما جه‌نگ (شه‌ر) لسه‌ر وان هات نڤیسین، هه‌ما د جیدا برره‌ک (کوومه‌ک) ژ وان وه‌ک ترسانا ژ خودێ؛ به‌لکی ترسانه‌ک هێژ پتر ژ وان (موشرکێن مه‌که‌هێ) ترسهان. و گووتن: ئه‌ی خودا، ته چره جه‌نگ لسه‌ر مه فه‌رز کر؟ دێ بلا ته ده‌مه‌ک کورت موهله‌ت بدا مه! بێژه: به‌هره‌مه‌ند بوونا ژ دونیایێ کێمه، و ژبوونا که‌سێ‌ های ژ ناڤبه‌ینا خوه و خودێ مایی ئاخره‌ت باشتره، و قاسی تاکێ به‌رکا خورمایێ ژی زولم لهه‌وه نایێ کرن.

78- هوون لکوو بن وێ مرن بگهێ هه‌وه، هه‌رچه‌ند هوون د که‌لهێن ئاسێڤه بن. و ئه‌گه‌ر خوه‌شیه‌ک سه‌ر وادا بێ، دبێژن: ئه‌ڤاهه ژ خودێیه؛ و ئه‌گه‌ر نه‌خوه‌شیه‌ک سه‌ر وا دابێ، دبێژن: ئه‌ڤاهه ژ ته‌یه. [ئه‌ی پێغه‌مبه‌ر] بێژه: هه‌می ژ ئالیێ خودێڤه یه ڤێجا چبیه ژ ڤی قه‌ومی کو نکارن (ئان: ناخازن) چ ئاخفتنه‌کی تێبگه‌ھن (فێهم بکن).

79- ڤێجا ئه‌و خوه‌شیا سه‌ر ته ‌دا بێ، ژ خودێیه، و نه‌خوه‌شیا سه‌ر ته دا بێژی ئه‌و ژ ته بخوه‌یه. و مه تو ب پێغه‌مبه‌ری ژ مرووڤا را هنارتی و خودێ ژ شاهدیێرا به‌سه.

80- ڤێجا که‌سێ گوهدارێ پێغه‌مبه‌ر بێ موحه‌قه‌ق ئه‌وی گوهداری یا خودێ کریه؛ و که‌سێ به‌رێ خوه بزڤرێنێ، ڤێجا مه تو ژ نووبه‌داری یا وارا رێنه‌کریی.

81- و دبێژن: ئه‌م گوهدارین، لێ ڤێجا ده‌ما ژ بال ته ده‌رکه‌تن، برره‌ک ژ وا شه‌ڤانه خێنجی وێ یا تو دبێژی ته‌یبیر دکن (ته‌یبیره‌ک دی ددن)، و خودێ ته‌یبیرا وا یا شه‌ڤانه دنڤیسێ. ڤێجا تو پشت بده وان و خوه‌ ب خودێ بگره، و خودێ ژ ‌پێگرتنێرا به‌سه.

82- ما گه‌لوو ڤێجا ئه‌و د [مه‌عنا] قورئانێدا نافکرن؟ و ئه‌گه‌ر ژ بال خێنجی خودێ بویا، بیه‌قین وێ ئختلافه‌ک (نه‌وه‌هی – دژاتی) زه‌حفی تێدا بدیتان.

83- و ده‌ما خه‌به‌ره‌ک یێ ئێمناهی یێ (ئاسایی) ئان ژ ترسێ بوو وان تێ، د گاڤێدا ئه‌وێ بلاڤ دکن؛ و ئه‌گه‌ر ئه‌و ب ئالیێ پێغه‌مبه‌ر و مه‌زنێن خوه یێن خوه‌یێ ڤی کاریڤه بدان، موحه‌قه‌ق د ناڤ واندا ئه‌و که‌س هه‌نه‌ کو (دورستی و نه‌دورستیا) وێ تێبگه‌هن. و ئه‌گه‌ر نه‌که‌ره‌م و ره‌حمه‌تا خودێ لسه‌ر هه‌وه ‌بویا، موحه‌قه‌ق خێنجی ژ کێمکا هوونێ بکه‌تان په‌ی شه‌یطان.

84- ڤێجا د‌ رێکا خودێدا شه‌ر بکه، ژ خوه پێڤه‌ تو ژ كه‌سیرا نه‌ که‌فیلی. و باوه‌ردارا هلێخه (راکه – مجد بکه ژ جهادێرا)، به‌لکی خودێ به‌رگریێ بکێ ژ زه‌ره‌رگهاندنا ئنکارکه‌ران؛ و خودێ دژوار جه‌نگ و دژوار ده‌ربتره.

85- که‌سێ ناڤیجیتێی (مه‌هده‌رێ) بکی؛ ناڤیجتییه‌ک باش [و بجی]، ژبوونا وی به‌هره‌ک ژ وێ هه‌یه؛ و که‌سێ ناڤجیتیه‌ک نه‌باش بکێ، ژ ویراژی پشکه‌ک ژ وێ هه‌یه. و خودێ لسه‌ر هه‌ر تشتی ب ده‌ستهه‌لاته.

86- و ده‌ما پێ باشیه‌کی قه‌نجی دگه‌ل هه‌وه هات کرن (سه‌لام، ئان هه‌دیه ئان هێژان و قه‌در و قیمه‌ته‌ک دان هه‌وه)، ڤێجا هوون پێ باشترێ ژ وێ، باشیێ بکن، ئان وه‌ک وێ ڤه‌گێرن. براستی خودێ حه‌سابکه‌ره لسه‌ر هه‌ر تشتی.

87- خودایه کو خێنجی ژ وی چ مه‌عبوود نینن. موحه‌قه‌ق رووژا قیامه‌تێ کو چ شک تێدا نینه، وێ هه‌وه به‌ر هه‌ڤ بکێ، وکییه ژ خودێ خه‌به‌ر راستتر.

88- ڤێجا چبیه ژ هه‌وه کو ده‌رحه‌ق منافقا دا هوون بوونه دوو به‌ند‌؟ حالحاله خودێ ئه‌و ژ به‌ر وێ یا کرین سه‌رنزم کرنه. ما گه‌لوو هوون دخازن که‌سێ خودێ ئه‌و د رێوندابوونێدا هشتی رێراست بکن؟ و که‌سێ خودێ ئه‌وی د رێوندابوونێدا بهێلێ، ڤێجا قه‌ت هوون ژ وی را چ رێکا په‌یدا ناکن.

89- ئه‌و حه‌زدکن کو خوه‌زکا وه‌ک چه‌وا ئه‌وا ئنکار کری هه‌وه ژی ئنکار بکرا دا ڤێجا هوون وه‌ک هه‌ڤ لێ بهاتان. نخوه ڤێجا هه‌ڤالا ژ وا نه‌گرن حه‌تا د رێکا خود‌ێد‌ا هجره‌ت بکن؛ ڤێجا ئه‌گه‌ر به‌رێ خوه زڤرداندن، هه‌وه ئه‌و ل کیده‌رێ دیتن بگرن و بکوژن؛ و دووست و ئاریکارا ژ وان نه‌گرن؛

90- خێنجی ژ وا که‌سێن کو گرێدان هه‌بن دگه‌ل وایێن سووزه‌ک د ناڤبه‌ینا هه‌وه‌دا هه‌یی؛ ئان ب سنگێ طه‌نگڤه ژ به‌ر شه‌رێ دگه‌ل هه‌وه ئان قه‌ومێ خوه هاتبن بال هه‌وه (حه‌زنه‌کن شه‌ر بکن). و ئه‌گه‌ر خودێ بخوه‌ستا موحه‌قه‌ق وێ ئه‌و سه‌ر هه‌وه بێخستان و بیه‌قین وێ گه‌ل هه‌وه شه‌ر بکران. ڤێجا ئه‌گه‌ر خوه ژ هه‌وه دان پاش و شه‌رێ هه‌وه نه‌کرن و پێکهاتن (صولح- لهه‌ڤهاتن) به‌رهه‌وه‌ڤه ئاڤێتن، هنگێ ئێدی خودێ چ رێک ژ هه‌وه‌ره لسه‌ر وان نه‌دانینه (کوهوون نه هه‌قی یێ بکن).

91- هوونێ هنه‌ک دی ببینن کو دخازن هه‌وه پشتراست بکن و قه‌ومێ خوه ژی پشتراست بکن. چقا کو ل فتنێ تێن زڤراندن، دکه‌ڤن ناڤێ؛ ڤێجا ئه‌گه‌ر ئه‌و خوه ژ هه‌وه نه‌دن پاش و پێکهاتنێ (ئاشتی- صولح- لهه‌ڤهاتن) به‌ر هه‌وه‌ڤه نه‌ئاڤێژن و ده‌ستێ خوه نه‌کێشن [ژخرابی و فتنێ]، ھنگێ هه‌وه ئه‌و ل کووده‌رێ په‌یدا کرن ئه‌وا بگرن، و بکوژن. ئه‌ون یێن مه ده‌ستهه‌لاته‌ک ئه‌شکه‌ره ژ هه‌وه‌را لسه‌ر وا چێکری.

92- و نابێ کو چ خوه‌ی ئیمانه‌ک باوه‌رداره‌کی بکوژێ، یا ژ خه‌له‌تیڤه ژێ ده‌ر. و که‌سێ ژ خه‌له‌تیڤه خوه‌ی ئیمانه‌ک کوشت گه‌ره‌ک عه‌ڤده‌کی باوه‌ردار ئازا بکێ و خوینبهایه‌ک ته‌مام بدێ مرووڤێن وی؛ ئللا کو ئه‌و ژێ ببوورن. و ئه‌گه‌ر [کوشتی] ژ قه‌ومه‌کی بێ کو دوژمنێن هه‌وه‌نه و ئه‌و [بخوه] باوه‌ردار بێ. هنگێ وێ [قاتل] عه‌ڤده‌کی باوه‌ردار ئازا بکێ (و نه‌لازمه خوینبهایێ بدێ وا). و ئه‌گه‌ر [مه‌قتوول] ژ قه‌ومه‌کییه کو د ناڤبه‌ینا هه‌وه و وادا سووز و قراره‌ک هه‌بێ، ڤێجا خوینبها یا ته‌مام وێ بدێ خوه‌یێن وی و عهڤد‌ه‌کی باوه‌ردار ژی ئازا بکێ، و که‌سێ [به‌نده - عه‌ڤد] ده‌س نه‌که‌ت، ڤێجا ته‌وبا وی ژ ئالیێ خودێڤه ئه‌وه دو مه‌ها لپه‌ی هه‌ڤ رووژی بگرێ. و خودێ پر زانایێ شه‌هره‌زایه.

93- و ڤێجا که‌سێ باوه‌رداره‌کی ب قه‌ست بکوژێ، جه‌زایێ وی جه‌هنه‌مه کو وێ د وێدا بمینێ؛ و غه‌زه‌با خودێ لسه‌ره؛ و له‌عنه‌ت لێ کریه؛ و ژ ویرا عه‌زابه‌ک مه‌زن حازر کریه.

94- گه‌لی که‌سێن هه‌وه باوه‌ری ئانیی، ده‌ما هوون د رێکا خودێدا (ژ جهادێ را) که‌تن‌ رێ، ل رووناهی کرنێ بگه‌رن و بوو که‌سه‌کی كو ئسلامه‌تی یا خوه ژ هه‌وه‌را گووت، نه‌بێژن: تو نه باوه‌رداری د‌اكو ھون ھه‌ییا ژیانا د‌ونیایێ بد‌ه‌ستخوه‌ڤه‌ بێنین(پێ کوشتنا وی)؛ چکو هه‌یینا زه‌حفی ئه‌وه لبال خودێ؛ هوون بخوه ژی پێشدا وه‌ره‌نگ بوون، ڤێجا خودێ منه‌ت لهه‌وه کر (هوون ئانین سه‌ر ئیمانێ) نخوه ڤێجا رووناهی بکن، براستی خودێ هه‌ر ئاگاهی هه‌بیه ب وێیا هوون دکن.

95- یێن نه‌خوه‌شیه‌ک هه‌یین ژێ ده‌ر، [وه‌یدی] نه وه‌ک ھه‌ڤن باوه‌ردارێن روونشتی و یێن ب مال و جانێ خوه د رێکا خودێد‌ا خه‌باتێ دکن. خودێ خه‌باتگێرێن ب جان و مالێ خوه ب ده‌ره‌جه‌یه‌کی سه‌ر روونشتیا را گرتنه. و ژهه‌میا را خودێ سووزا باشیێ دایه. و [لێ] پێ کرهه‌ک مه‌زن خه‌باتگێر سه‌ر روونشتیارا گرتنه.

96- [ ئه‌ڤ خێرا مه‌زن] ده‌ره‌جه‌نه ژ ئالیێ و یڤه؛ و لێبوورینه و ره‌حمه‌ته. و خودێ لێبوور و گه‌له‌ک بره‌حمه.

97- ئه‌ڤ حه‌قیقه‌ته‌که کو که‌سێن زولم لخوه کرین، [ده‌ما] مه‌لائیکه‌ت جانێ وا دگرن، دبێژن [وا]: هوون د چ حالی دا بوون؟ دبێژن: ئه‌م د عه‌رێدا هاتبین ژار کرن (موسته‌ضعه‌ف بوون). دبێژن: ما عه‌ردێ خودێ نه فره‌ھـ بی دا ڤێجا هوون تێدا هجره‌ت بکن ؟ ڤێجا جهێ وا جه‌هنه‌مه و پیس جهه.

98- خێنجی ژ وا مێر و ژن و زارووکێن هاتین بنده‌ستکرن (ژار کرن) کو چ چارا ژ خوه‌را نابینن و چ رێکا په‌یدا ناکن؛

99- ڤێجا هێڤی ئه‌وه خودێ وا عه‌فوو بکێ؛ و خودێ عه‌فووکه‌رێ لێبووره.

100- و که‌سێ هجره‌تێ بکێ د رێکا خودێدا وێ گه‌له‌ک جهێن ڤه‌حه‌وهانێ (ئان: گه‌له‌ک تشتێن نه‌خوه‌ش) و به‌رفره‌ھیێ ببینێ. و که‌سێ ب قه‌ستا هجره‌تا بال خودا و پێغه‌مبه‌رێ ویڤه‌ ژ مالا خوه ده‌رکه‌ڤێ د په‌یرا مرنا وی بگهێ موحه‌قه‌ق کرها وی که‌تیه سه‌رخودێ. خودێ لێبوورێ پر بره‌حمه.

101- و ده‌ما هوون د عه‌رد‌ێدا ب سه‌فه‌ر چوون، ئه‌گه‌ر هوون طرسهان ئه‌وێن که‌تین کوفرێ زه‌ره‌رێ بگهینن هه‌وه، چ گونه‌ھ لسه‌ر هه‌وه نینه‌ کو هوون ژ نمێژێ کورت بکن. براستی ژ به‌رێدا ئنکارکه‌ر ژ هه‌وه‌را دوژمنێن ئه‌شکه‌ره‌نه.

102- و ده‌ما تو د ناڤ واندا بی ڤێجا ته پێشمێژی ژ وانرا کر، بلا بره‌ک ژ وا ب چه‌ک و سلاحێن خوه‌ڤه گه‌ل ‌ته [ژ نمێژێرا] راوه‌ستن، ڤێجا ده‌ما چوون سه‌جدێ [و مێژا خوه خلاس کرن] بلا لپش هه‌وه بسه‌کنن؛ و بره‌ک دی یێن نمێژ نه‌کرین بلا بێن و ب چه‌کێن خوه‌ڤه گه‌ل ‌ته نمێژ بکن و های ژ خوه هه‌بن. چکو ئه‌وێن که‌تین کوفرێ وه‌لێ دخازن کو هوون بێ خه‌به‌ر ببن ژ چه‌ک و په‌رتالێن خوه دا ژ نشکێڤه قه‌ستا هه‌وه بکن (هێرشێ بینن سه‌ر هه‌وه). و ئه‌گه‌ر ژ به‌ر بارانێ هوون د زه‌حمه‌تێدا بن ئان هوون نه‌خوه‌ش بن، چ گونه‌ھ وه نینه‌ کو هوون چه‌کێ (سلاح) خوه ده‌ینن، لێبه‌لێ های ژ خوه هه‌بن. براستی خودێ ژ ئنکارکه‌را را عه‌زابه‌ک رزیلکه‌ر حازر کریه.

103- ده‌ما هه‌وه نمێژ خلاس کر، د حالێ راوه‌ستان و روونشتن و لسه‌ کێله‌کێ، خودێ بینن بیر. ڤێجا ده‌ما هوون دلرحه‌ت بین، هنگێ نمێژێ بجی بینن، براستی نمێژ د وه‌ختێن کفشه‌دا لسه‌ر باوه‌ردارا هاتیه نڤیسین.

104- و سستیێ نه‌کن د په‌ی که‌تنا کووما [دوژمنا] د‌ه. ئه‌گه‌ر هوون دئێشن. ڤێجا براستی ئه‌و ژی د ناڤ ئێشێدانه وه‌ک چه‌وا هه‌وه ئێشان هه‌یی، و حالحاله هوو ئه‌وێ ژ خودێ هێڤیدارن یا ئه‌و نه‌هێڤیدار. و ژ به‌رێڤه خودێ پر زانا و شه‌هره‌زایه.

105- مه ئه‌ڤ کتێب بحه‌ق سه‌ر ته‌دا شاند، دا گووره‌کی وێ یا خودێ نیشا ته‌ کری ناڤ خه‌لکێدا حوکم بکی. و نه وه‌بێ تو پشتیڤانێ خیانه‌تکارا بی.

106- و لێبوورینێ ژ خودا بخازه‌، براستی خودێ لێبوورێ پر بره‌حمه.

107- و به‌ره‌ڤانیێ نه‌که ژ وا که‌سێن خیانه‌تێ لخوه دکن، راستی ئه‌ڤه کو خودێ حه‌ژ چ خیانه‌تکه‌رێن گونه‌هکار ناکێ.

108- [پیساتیێن خوه] ژ خه‌لکێ خه‌ف دکن و ژ خودێ خه‌ف ناکن (نکارن ژ خودێ ڤه‌شێرن. ئان: ژ خه‌لکێ شه‌رم دکن و ژ خودێ شه‌رم ناکن)؛ حالحاله خودا دگه‌ل وایه ده‌ما شه‌ڤانه ب ئاخفتنێن ئه‌وپێ نه‌رازی ته‌یبیرا ددنێ. و خودێ ب وێ یا ئه‌و دکن ئاگاهه.

109- ئها، هوون ئه‌ڤێنهه ئه‌ون یێن د ژیانا دونیایێدا به‌ره‌ڤانی ژ وا کرێ، ڤێجا کییه د رووژا قیامه‌تێدا ل به‌رابه‌رێ خودێدا لاگریێ ژ وا بکێ؟ ئان کی هه‌یه کو ئه‌و خوه بسپێرنێ.

110- و که‌سێ کارێ خراب بکێ ئان زولمێ لخوه بکێ، پاشێ داخازا لێبوورینێ ژ خودێ بخازێ، وێ ببینێ کو خودێ لێبورێ پر بره‌حمه.

111- و ڤێجا که‌سێ گونه‌هه‌کی بکێ، ئه‌وی ئه‌و د زه‌ره‌را خوه‌دا پێک ئانیه. و خودێ پر زانایێ شه‌هره‌زایه.

112- و ڤێجا که‌سێ خه‌له‌تی ئان گونه‌هه‌کی بکێ، پاشێ ئه‌وێ باڤێژێ سه‌ر یێ ئه‌و نه‌کری، موحه‌قه‌ق ئه‌وی بێبه‌ختی و گونه‌هه‌ک ئه‌شکه‌ره هلگرتیه.

113- و ئه‌گه‌ر نه‌ که‌ره‌م و ره‌حمه‌تا خودا بویا لسه‌ر ته، موحه‌قه‌ق برره‌ک (کوومه‌ک) ژ وا، بربین دلێ خوه کو ته ژرێ ده‌رینن، لێ خێنجی ژ خوه [که‌سی] ژ رێ ناده‌رینن؛ و قه‌ت چ زه‌ره‌رێ لته ناکن. و خودێ کتێب و حکمه‌ت سه‌ر ته‌دا شاند و تو هین کری (عه‌لماندی) وێ یا ته نه‌دزانی یا. و ئلله‌هـ که‌ره‌ما خودێ لسه‌ر ته گه‌له‌ک مه‌زنه.

114- دگه‌له‌ک ژ خه‌ف خه‌به‌ردانێن وا دا خێر نینه، خێنجی کوکه‌سه‌ک [دڤێ خه‌ف خه‌به‌ردانێ دا] هایدانێ بکێ ژ خێراته‌کیرا ئان ژ باشیه‌کیرا ئان پێکهاتنه‌کی د ناڤبه‌ینا خه‌لکێدا. و ڤێجا که‌سێ ئه‌وێ ژ به‌ر ده‌ستڤه ئانینا رازیبوونا خودێ بکێ، ئه‌مێ خێره‌ک مه‌زن بدینێ.

115- و که‌سێ پشتی کو رێکا راست ژێرا ئه‌شکه‌ره‌ بی موخاله‌فه‌تا پێغه‌مبه‌ر بکێ، و ب رێکه‌کیڤه بچێ کو نه رێکا باوه‌ردارا بێ، ئه‌مێ وی د ناڤ وێ یا ئه‌وی به‌رێ خوه دایی یێ دا بهێلین و ئه‌وی باڤێژن جه‌هنه‌مێ؛ و چ پیس زڤرینگه‌هه.

116- راستی ئه‌ڤه کو خودێ لڤێ چه‌ندێ نابوورێ کو شریک ژێرا بێن چێکرن؛ و یا بن وێرا ل وی که‌سی دبوورێ یێ بخازێ. و که‌سێ شریکا ژ خودێرا چێکێ، موحه‌قه‌ق ئه‌و که‌تیه رێ وندابینه‌ک دویر و د‌رێژ.

117- [موشرک] شوونا ویدا خێنجی ژ مێ یا را (اُنثی- تشتێن گوهه‌رین دکه‌فتێ و ته‌ئسیر لێ تێ کرن) عباده‌ت ناکن؛ ئه‌و ناپه‌ره‌ستن ژ شه‌یطانه‌کی حێچ پێڤه؛

118- خودێ له‌عنه‌ت لێ (شه‌یتان) کر؛ و [ئه‌وی] گووت: موحه‌قه‌ق ئه‌زێ ژ ناڤ عه‌ڤدێن ته به‌هره‌کی ڤه‌بریی بگرمه‌

119- و صووندبێ، ئه‌زێ وا ژ رێ وندا بکم و خوه‌زیێن دویر و درێژ بێخم دلێ وا؛ و ئه‌زێ وا های بدم ڤێجا وێ گوهێ حه‌یوانا بکه‌لێشن (کو ژ پوتا را بێ ڤه‌قه‌تاندن)؛ و ئه‌زێ وا های بدم (ده‌ستوورێ بدم) دا گوهه‌رینێ بێخن چێکرنا خودێ. ڤێجا که‌سێ شوونا خودێدا شه‌یطان بکێ مه‌زنێ خوه، بیه‌قین ئه‌و خوسریه (زیان لێ بویه) ب خوسرینه‌ک ئه‌شکه‌ره.

120- [شه‌یطان] سووزێ ددێ وان و خوه‌زی یا ژ وانرا چێدکێ، و ئه‌و سووزا شه‌یطان ددێ وا ژ خاپاندنێ پێڤه نه تشته‌ک دییه.

121- ئه‌ون کو جهێ وا جه‌هنه‌مه، و رێکا ره‌ڤێ ژ وێده‌رێ په‌یدا ناکن.

122- و ئه‌مێ وایێن باوه‌ری ئانیین و کارێن قه‌نج کرین ببین ژوورڤه‌یێ بهشتا، کو رووبار د بنر‌ا دهه‌رکن، ئه‌و هه‌روهه‌ر د وێدا دمینن. سووزا خودێ حه‌قه؛ و کی د خه‌به‌ردانێ دا ژ خودێ راستتره.

123- [خێر د‌ان و جه‌زا كرن] نه پێ خوه‌زیا هه‌وه و نه پێ خوه‌زیا ئه‌هلێ کتابه؛ که‌سێ خرابیه‌کی بکێ وێ ب وێ بێ جه‌زادان؛ و خێنجی ژ خودێ ژ خوه‌را خوه‌یی و ئاریکاره‌کی نابینێ.

124- و ڤێجا ئه‌وێن ژ ناڤ كارا کارێن قه‌نج بکن، چ مێر بێ و چ ژن، د حاله‌کیدا کو ئه‌هلێ ئیمانێ بێ، وێ بچن د بهشتێ دا و قاسی چالکا لسه‌ر پشتا به‌رکێ خورمێ ژی زولم ل وا نایێ کرن.

125- و دینێ کی باشتره ژ [یێ] وی که‌سێ کو خوه ته‌سلیمێ خودا کری و قه‌نجکار بێ ژی و که‌تبێ په‌ی دینێ سه‌راستێ ئبراهیم؟ و خودێ ئبراهیم ژ خوه‌را کریه خوه‌شدڤێ (ددوست).

126- وژ خودێرایه حه‌چی یا د عه‌سمانا و عه‌ردێد‌ا، و خودێ هه‌می تشت د‌اگیر كریه‌ (هه‌ر تشت لبن زانینا و یدا یه).

127- و ده‌رحه‌ق ژنا دا فکراته دپرسن. بێژه: ده‌رحه‌ق وادا خودێ ژ هه‌وه‌ره فه‌توایێ ددێ و [هه‌روها] ئه‌وا د قورئانێدا لسه‌ر هه‌وه تێ خوه‌ندن: ده‌رحه‌ق ژنێن یه‌تیم‌دا کو هوون حه‌قێ وا یێ ژ وانرا هاتی ڤه‌برین نادن وا و هوون حه‌ز دکن گه‌ل وا بزه‌وجن، و [ده‌رحه‌ق] زارووکێن به‌له‌نگاز دا و ئه‌ڤێ چه‌ندێ کو هون گه‌ل یه‌تیما ب ‌عه‌داله‌ت رابن [جه‌وا با هه‌وه ددن]. و براستی چ کارێ قه‌نج کو هون دکن خودێ پێ زانێ.

128- و ئه‌گه‌ر ژنه‌ک ژ ئداره نه‌کرن (حێچ بوون) ئان پشت دانا زه‌لامێ خوه طرسها، ڤێجا چ ‌گونه‌ھ ژ وانرا نینه‌کو ب رێکا لهه‌ڤهاتنێڤه ب ئاوایه‌کی پێک بێن. و لهه‌ڤ خوه‌شبوون (ئاشتی) باشتره، و [لێ] به‌خیله‌تی (ژ خوه‌ره خوه‌ستن) د ناڤ نه‌فسا دا یه. ڤێجا ئه‌گه‌ر هون [زه‌لام] قه‌نجی یێ بکن و های ژ ناڤبه‌ینا خوه و خودێ هه‌بن [بزانن] خودێ ب وێ یا هوون دکن ئاگاهی هه‌یه.

129- و هوون چقا خوه ره‌حت ژی بکن، قه‌ هوون نکارن دورستیێ بێخن ناڤبه‌ینا ژنا، نخوه ب ته‌مامی مه‌یلا خوه نه‌د‌‌ن ئالیه‌کی، دا ڤێجا هوون [ژنا دی] هلاویستی بهێلن (کو چ ژ خوه نه‌زانێ). و ئه‌گه‌ر هوون دورستیێ د ناڤبه‌ینا خوه‌دا چێکن و های ژ خوه بمینن. ژ خوه خودێ لێبوور و پر بره‌حمه.

130- و ئه‌گه‌ر هه‌ردو (ژن و مێر) ژ هه‌ڤ جدابین، وێ خودێ ژ به‌رفره‌ھیا خوه [بدێ وا و] ئه‌وا بێئحتیاج بکێ؛ و خودێ به‌رفره‌ھکه‌رێ شه‌هره‌زایه.

131- وژ خودارایه ئه‌وا د عه‌سمانادا و یا د عه‌ردێدا؛ و مه بوو وا که‌سێن پێشیا هه‌وه‌دا کتاب ژ وانرا هاتی و ژ هه‌وه‌را وه‌صیه‌ت کر کو: های ژ ناڤبه‌ینا خوه و خودێ هه‌بن (ب ته‌قوا بن) و ئه‌گه‌ر هوون ئنکار بکن، ڤێجا براستی ژ خود‌ێرایه ئه‌وا د عه‌سمانا و یاد عه‌ردێدا. و خودێ بێ‌نیازێ خودان په‌صنه.

132- و ئه‌وا د عه‌سمانادا و یا د عه‌ردێ ژ خودارایه، و خودێ به‌سه ژ خوه پێ گرتنێرا.

133- ئه‌گه‌ر خودێ بخازێ وێ هه‌وه ببێ و هنه‌ک دی بێنێ، و خودێ کارایه ژ کرنا ڤی کاریرا.

134- که‌سێ خێرا دونیایێ بخازێ، ڤێجا خێرا دونیایێ و ئاخره‌تێ (هه‌ردوو پێکڤه) لبال خودایه، و خودێ بهیسه‌رێ بینه‌ره.

135- گه‌لی که‌سێن هه‌وه باوه‌ری ئانیی، دائیما عه‌داله‌تێ (دورستی) راگرن و ژ خودێرا شاهدیێ بدن هه‌ر چه‌ندب زه‌ره‌را هه‌وه بخوه‌ بێ ئان (ب زه‌ره‌را) د‌ێ و باب و مرووڤێن ھه‌وه‌. ئه‌گه‌ر [یێك ژ ھه‌رد‌و ئالیێن د‌ه‌عوێ] ده‌وله‌مه‌ند ئان فه‌قیر بێ خودێ سه‌ر وارا یه، ڤێجا نه‌که‌ڤن پێ بایێ د‌لێ خوه‌ کو هوون خوه‌هر ببن [ژ دورستی]. ڤێجا ئه‌گه‌ر هوون خوه‌هر ببن [د شاهدیێدا] ئان ته‌رک بدن، براستی خودێ ئاگاھه‌ ب وێ یا هوون دکن.

136- ئه‌ی گه‌لی که‌سێن هه‌وه ئیمان ئانیی، باوه‌ریێ بینن ب خودێ و پێغه‌مبه‌رێ وی و ‌وێ کتێبا ژ پێغه‌مبه‌رێ خوه را رێکری و ئه‌و کتێبا کو ژ پێشدا شاندی. و که‌سێ ئنکارا خودێ و مه‌لائیکه‌تێن وی و کتێبێن وی و پێغه‌مبه‌رێن وی و رووژا ئاخره‌‌تێ بکێ، بیه‌قین ئه‌و [ژ رێ] وندا بیه، وندابوونه‌ک دویر و درێژ.

137- براستی که‌سێن باوه‌ری ئانیین پاشێ ئنکارکرین، دیسا باوه‌ری ئانیین و پاشێ ئنکارکرین د په‌یرا سه‌ر کوفرا خوه‌ڤه زێده کرین، قه‌ت خودێ ل وا نابوورێ و قه‌ت چ رێکه‌کێ نیشا وا ناکێ.

138- منافقا خه‌به‌ردار بکه کو موحه‌قه‌ق ژ وانرا یه عه‌زابێ بئێش [و ژان]؛

139- هه‌ما ئه‌وێن شوونا خوه‌ی ئیمانا دا کافرا دکن مه‌زنێ خوه‌‌؛ ما لبال وا ل سه‌رفرازیێ دگه‌رن؟ ڤێجا [بلا بزانن کو] سه‌رفرازی پێکڤه یا خودێیه.

140- و بیه‌قین [خودێ] د کتێبێدا ژ هه‌وه‌را رێکریه کو: که‌نگێ هه‌وه بهیست ئایه‌تێن خودێ تێن ئنکارکرن و دبن طه‌ڤزووک (قه‌شمه‌ری و ترانه پێ تێن کرن) هنگێ هوون دگه‌ل وا نه روونێن، حه‌تا مژوولێ خه‌به‌ردانه‌ک دی ببن ژ غه‌یری وێ، [ئه گه‌ر نه] هنگێ هوون ژی دبن وه‌ک وان. راستی ئه‌ڤه کو خودێ وێ کافر و منافقا پێکڤه د‌ جه‌هنه‌مێدا کووم بکێ.

141- ڤێجا ئه‌وێن خوه لبه‌رهه‌وه‌ ڤه‌دایین (د که‌مینێ دا)؛ ئه‌گه‌ر ژ ئالیێ خودێڤه سه‌رکه‌تنه‌ک ژ هه‌وه‌ره هه‌بێ، دبێژن: ما ئه‌م نه دگه‌ل هه‌وه ‌بین؟ و ئه‌گه‌ر کافر خودان به‌هر بن، دبێژن: ما نه ئه‌م لسه‌ر هه‌وه خورت بین و مه باوه‌ردار ژ هه‌وه دد‌ان پاش‌؟ ڤێجا وێ خودێ رووژا قیامه‌تێ ناڤبه‌ینا هه‌وه‌ده حوکم بکێ؛ و قه‌ت خودێ ل به‌رابه‌رێ باوه‌ردارا دا چ رێک (یێن سه‌رکه‌تنێ) ژ کافرا را نه دانینه.

142- منافق لێهبا (خاپاندنێ) دگه‌ل خودێ دکن، حالحاله ئه‌و خاپینووکێ سه‌ر وا دا ددێ، و ده‌ما ژ نمێژێ را رادبن ب سستی رادبن، ریایێ دگه‌ل خه‌لکێ دکن و ژكێمه‌کی پێڤه خودێ نادن بیرا خوه.

143- د وێ ناڤبه‌ینێ دا دودلن، نه ب ڤی ئالیڤه‌نه (ئالیێ موسمانا) و نه ب وی ئالیڤه (کافرا). و ڤێجا که‌سێ خودێ ئه‌وی ل رێ وندا بکێ، تو قه‌ت چ رێکا ژێرا نابینی؟

144- ئه‌ی گه‌لی که‌سێن هه‌وه باوه‌ری ئانیی، شوونا باوه‌ردارا دا کافرا ژ خوه‌ره نه‌کن هه‌ڤال. ما هوون دخازن ب زه‌ره‌را خوه ده‌لیله‌ک ئه‌شکه‌ره ژ خودێرا ده‌نین؟‌

145- براستی منافق د بنیا بنێ ئاگر دا نه، و تو قه‌ت چ ئاریکارا ژ وانرا نابینی.

146- خێنجی ژ واێن ته‌وبه کرین و کارێن دورست بجی ئانین و خوه ب خودێ گرتین و دینێ خوه ژ خودێرا خوه‌ری کرین، ڤێجا ئه‌و گه‌ل ئه‌هلێ ئیمانێنه ووێ خودێ کرهه‌ک مه‌زن بدێ خوه‌ی ئیمانا.

147- ئه‌گه‌ر هوون شوکردار بن و هه‌وه باوه‌ری ئانی، وێ خودێ چ ژ عه‌زابێ هه‌وه بکێ؟ و خودێ ئلله‌هـ قه‌درێ شوکرداری یێ زانێ و پر زانایه.

جزووك/٦

148- خودێ حه‌ژ گووتنا خه‌به‌رێن پیس ب ده‌نگێ بلند ناکێ، خێنجی ژ که‌سێ زولم دیتی. و خودێ بهیسه‌رێ پرزانایه.

149- ئه‌گه‌ر هوون خێره‌کی ئه‌شکه‌ره بکن ئان ڤه‌شێرن، ئان ل خرابیه‌کی ببوورن (عه‌فوو بکن) ڤێجا خودێ لێبورێ کارایه.

150- براستی که‌سێن ئنکارا خودێ و پێغه‌مبه‌رێن وی دکن و دخازن جداهیێ بێخن ناڤبه‌ینا خودێ و پێغه‌مبه‌رێن وی؛ و دبێژن: مه باوه‌ری هه‌یه ب هنه‌کا و ئه‌م هنه‌کا ئنکار دکن، و دخازن د وێ ناڤبرێ دا رێکه‌کی بگرن به‌رخوه؛

151- هه‌ما ئه‌ون کافرێن راسته‌راست، و مه ژ کافرا را عه‌زابه‌ک رزیلکه‌ر حازر کریه.

152- و که‌سێن ئیمان ئانیین ب خودێ و پێغه‌مبه‌رێن وی و جداهی نه ئێحستین د ناڤبه‌ینا چ یێک ژ واده، ئه‌و ئه‌ون کو ئه‌مێ کرهێن وا بدین وان، و خودێ لێبوورێ پر بره‌حمه.

153- ئه‌هلێ کتاب ژ ته دخازێ کو تو [جاره‌کیدا] کتێبه‌کی ژ عه‌سمانا ژ وانرا بینی خارێ، ڤێجا بیه‌قین ژ وێ مه‌زنتر ژ مووسا خوه‌ستن؛ گووتن: خودێ نیشا مه بکه ب ئه‌شکه‌ره‌هی. ڤێجا ژ به‌ر زولما وان بروسکێ ل وا دا. پاشێ پشتی ده‌لیلێن رووناهی ژ وانرا هاتی، گوولک (ژ په‌ره‌ستنێ را) گرتن، ڤێجا مه ئه‌وژی عه‌فووکر، ومه به‌لگه‌یه‌ک (ده‌لیل) ئه‌شکه‌ره دا مووسا.

154- ومه [چیایێ] طوور ژ به‌ر سووز و قرارا وان ل راسه‌رێ وا بلند کر، و گووت وان: د حالێ سه‌جدێدا د ده‌ریرا هه‌رن ژوورڤه‌؛ و مه گووت وان: د رووژا شه‌میێدا زێده‌گاڤیێ نه‌کن؛ و مه سووزه‌ک قاهیم ژ وا سلطاند‌.

155- ڤێجا ژ به‌ر شکاندنا سووزا خوه؛ و ئنکارا ئایه‌تێن خودێ؛ و کوشتنا پێغه‌مبه‌ران ب نه‌حه‌قی؛ و گووتنا وان [کو گووتن]: دلێن مه كالان کرینه [مه له‌عنه‌ت لوا کر]؛ به‌لکی خودێ ژ به‌ر کوفرا وان دلێ وا موهر کریه، ڤێجا خێنجی کێمه‌کا باوه‌ریێ ناینن؛

156- و ژ به‌ر کوفرا وان و ژ به‌ر وێ بێبه‌ختی یا وا یا مه‌زن کو لسه‌ر مه‌ریه‌مێ گووتین؛

157- و گووتنا وان کو: مه پێغه‌مبه‌رێ خودێ، مه‌سیح، عیسایێ کورێ مه‌ریه‌مێ کوشت. حالحاله ئه‌و نه‌کوشتنه و ل سێدارێ نه‌دانه، و لێبه‌لێ لبه‌ر وا وه‌لێهات. و که‌سێن ده‌رحه‌ق ویدا نه یێک گووتن، بیه‌قین د بارا ویدا د شکێدانه؛ خێنجی ژ په‌یکه‌تنا گومانێ ئه‌وا چ زانین نینه؛ و یه‌قینه ‌کو ئه‌و نه‌کوشتنه.

158- به‌لکی خودێ ئه‌و ب ئالیێ خوه‌ڤه بلند کریه، و خودێ خوررتێ شه‌هره‌زایه.

159- و که‌س ژ ئه‌هلێ کتێب نینه ئللا کو موحه‌قه‌ق وێ پێشیا مرنا وی (عیسا) ئیمانێ پێ بێنێ، و رووژا قیامه‌تێ ژی وێ لسه‌ر وان شاهد بێ.

160- ڤێجا ژ به‌ر وێ زولما ژ جهو یا چێبیی و ژ به‌ر به‌رگریا وا یا پر ژ رێکا خودێ، تشتێن پاک کو ژ وانرا حه‌لال بوون مه لسه‌ر وا حه‌رام کرن.

161- و [ژ به‌ر] گرتنا وا یا ربایێ، حالحاله نه‌هیا وا ژێ هاتبی کرن؛ و خارنا مالێ خه‌لکێ ب نه‌حه‌قی. و ژ کافرێن وا ره مه عه‌زابێ بئێش حازر کریه.

162- لێبه‌لێ ژ وان (جھو یا) ئه‌وێن گھایین کویراتیا زانینێ (د زانینێدا پژهایین) و باوه‌ردارا، ئیمان هه‌نه ب وێ یا ژ ته‌را هاتی و یا پێشیا ته ‌دا هاتی خارێ. و ئه‌مێ کرهه‌ک مه‌زن بدن: نمێژکه‌ران و زه‌کاتده‌ران و باوه‌رکه‌رێن خودێ و رووژا ئاخره‌تى.

163- براستی مه وه‌حی ژ ته‌را رێکر وه‌ک چه‌وا مه ژ نووح و پێغه‌مبه‌رێن پاش ویرا وه‌حی رێکری؛ و مه ژ: ئبراهیم و ئسماعیل و ئسحاق و یه‌عقووب و ئه‌سباط و عیسا و ئه‌ییوب و یوونس و هاروون و سوله‌یمان را ژی وه‌حی رێکر، و مه زه‌بوور دا داوود.

164- و مه‌ ژ پێشد‌ا به‌حسا هنه‌ک پێغه‌مبه‌را ژ ته را کر، و هنه‌ک پێغه‌مبه‌ر ژی مه‌ به‌حسا وا ژ ته‌را نه‌کریه . و ب ئاوایه‌ک یێ خربه‌ردانێ خودێ گه‌ل مووسا ئاخفت.

165- ئه‌و پێغه‌مبه‌ر مزگینده‌ر و ترسینه‌ر بین، دا پشتی ڤا پێغه‌مبه‌را ئێدی خه‌لکێ ل به‌ر خودێ چ ده‌لیل نه‌بن. ‌و خودێ خوررت و شه‌هره‌زایه.

166- لێبه‌لێ خودێ شاهدیێ ددێ ب [دورستیا] وێ یا ژ ته‌را رێکری؛ ئه‌و ب زانینا خوه هنارتیه، و مه‌لائیکه‌ت ژی شه‌هده‌یی یێ ددن؛ و خودێ ژ شاهدیێ را به‌سه.

167- براستی ئه‌و که‌سێن که‌تین کوفورێ و به‌رگری ژ رێکا خودێ کرین، بیه‌قین ئه‌و وندا بوونه، وندابوونه‌ک دویر و درێژ.

168- موحه‌قه‌ق ئه‌و که‌سێن که‌تین کوفرێ و زولم کرین، خودێ قه‌ت ل وا نابوورێ و ئێکجار چ رێکا ژی نیشا وا ناکێ،

169- خێنجی رێکا جه‌هنه‌مێ، کو وێ هه‌رو هه‌ر تێدا بمینن، و ئه‌ڤاهه ژ خود‌ێرا هێسانه (رحه‌ته).

170- مرووڤنوو! بیه‌قین ئه‌ڤه پێغه‌مبه‌ر ژبال خودایێ هه‌وه دورستی ژ هه‌وه‌ره ئانی، ڤێجا وه‌رن سه‌ر ئیمانێ کو ژ هه‌وه‌ره با شتره؛ و ئه‌گه‌ر هون ئنکار بکن، ژ خوه ئه‌وا د عه‌سمانا و عه‌ردێدا یا خودێیه، و خودێ ژ ئه‌ولڤه پر زانایێ شه‌هره‌زایه.

171- ئه‌ی ئه‌هلێ کتێب، د دینێ خوه دا نه‌که‌ڤن زێده‌گاڤیا، و خێنجی ژ یا حه‌ق لسه‌ر خودێ نه‌بێژن؛ مه‌سیح، عیسایێ کورێ مه‌ریه‌مێ هه‌ما تنێ پێغه‌مبه‌رێ خودێیه. ئه‌و که‌لیما وی بی کو به‌ر مه‌ریه‌مێڤه ئاڤێت (گووتنا خودێ بی کو گووت: هه‌به = کن، هه‌ما د جیدا و بێ‌ی سه‌به‌به‌ک عه‌ده‌تی د زکێ مه‌ریه‌مێ دا چێبی)؛ و رحه‌که ژ ئالیێ ویڤه. ڤێجا ئیمانێ بینن ب خودێ و پێغه‌مبه‌رێن وی، ‌و نه‌بێژن (خودێ) سسێ نه. به‌س بکن کو ژ هه وره باشتره. هه‌ما تنێ خودا مه‌عبووده‌ک ته‌که؛ دووره ژ وی کو زارووک هه‌بێ. حه‌چی یا د عه‌سمانادا و یا د عه‌ردێدا هه‌می ژ ویرا یه. و خودێ ژ خوه پێ گرتنێرا به‌سه.

172- مه‌سیح ‌قه‌ت حاشا ناکێ کو به‌نده بێ ژ خودا را و مه‌له‌کێن موقه‌رره‌ب ژی [هه‌ر وه‌ره‌نگ]. و حه‌چی که‌سێ خوه ژ به‌نده‌تیا وی پاشدا بگرێ و خوه مه‌زن بکێ، وێ هه‌میا ب ئالیێ خوه‌ڤه به‌رھه‌ڤ بکێ،

173- ڤێجا هندیکه ئه‌ون یێن ئیمان ئانیین و کارێن قه‌نج کرین، وێ کرها وا ب ته‌مامی بدێ وا و ژ که‌ره‌ما خوه ژی ل وا زێده بکێ. و ئه‌ما که‌سێن خوه پاشدا گرتین [عه‌ڤدینی حاشا کرین] و خوه مه‌زن کرین، وێ ئه‌وا عه‌زاب بدێ ب عه‌زابه‌ک ب ئێش. و شوونا خودێدا ژ وانرا چ مه‌زن و ئاریکا را نابینن.

174- مرووڤنوو!‍ حه‌قیقه‌ت ئه‌ڤه کو ژ ئالیێ خودایێ هه‌وه‌ڤه ده‌لیله‌ک رووناهی هاتیه، و مه ژ هه‌وه‌را رووناهیه‌ک ئه‌شکه‌ره هنارت.

175- ڤێجا که‌سێن باوه‌ری ب خودێ ئانیین و خوه ب وی پارازتین، وێ ئه‌وا بێخی د ناڤ ره‌حه‌ت و که‌ره‌مه‌کی ژ ئالیێ خوه‌ڤه، و لسه‌ر رێکه‌ک راست وێ ئه‌وا ب ئالیێ خوه‌ڤه ببێ.

176- داخازا جه‌وابێ ژ ته دکن، بێژه: ده‌رحه‌ق که‌لاله یێ دا خودێ جه‌وابا هه‌وه ددێ کو: ئه‌گه‌ر مرووڤه‌ک بمرێ کو زارووک تنه‌بن و خوشکه‌ک یا وی هه‌بێ ڤێجا نیڤێ میراتا د جیدا هشتی ژ وێرایه، و ئه‌وژی میراتێ ژ وێ [خوشکێ] دبێ ئه‌گه‌ر وێ زارووک نه‌بن. ڤێجا ئه‌گه‌ر [میراتبه‌ر] دو خوشک بن ، دوسێکا میراتێ ژ هه‌ردوکارا یه. و ئه‌گه‌ر چه‌ند خوشک و برابن، هنگێ به‌هرا مێر قاس به‌هرا دو ژنا یه. خودێ ژ هه‌وه‌را رووناهی دکێ دا نه‌وه‌بێ کو هوون رێکا خوه شاش بکن، و خودێ ئاگاهه ژ هه‌ر

نظرات

ارسال نظر

* فیلدهای ستاره دار حتما بایستی مقدار داشته باشند.