۞ ئاخفتنا 193 ۞

۞ ئاخفتنا 193 ۞

مقالات مرتبط

هاتیه‌ روایه‌ت کرن کو میرێ باوه‌رداران (س) هه‌ڤاله‌ک هه‌بی، دگووتانێ «هه‌مام» ئه‌و مرووڤه‌ک عابد بی. رووژه‌کی گووتێ: ئه‌ی میرێ باوه‌رداران، ژ بوونا من وصا به‌حسا ئه‌هلێ ته‌قوایێ بکه‌، حه‌چوه‌کو ئه‌ز وان ببینم. ڤێجا ئه‌وی سه‌لامێن خودێ لێ بن هنه‌کی خوه‌ گران کر و جه‌وابا وی پاشڤه‌ دا، پاشێ گووت: «ئه‌ی هه‌مام! ژ خودێ بطرسه‌ و قه‌نجی یێ بکه‌، چکو خودێ دگه‌ل وان که‌سایه‌ ئه‌وێن ژ خودێ بطرسن و هه‌ر وها دگه‌ل وا که‌سا یه‌ ئه‌وێن قه‌نجی که‌ر». لێبه‌لێ هه‌مام ب ڤی قاسی رازی نه‌بی و ئه‌و دا صووندێ. ڤێجا ئمام حه‌مد و سه‌نایێ خودێ گووتن و صه‌له‌وات دان پێغه‌مبه‌ر (ص) و گووت:

أما بعد، براستی خودایێ بلند و پاک مه‌خلووق خولقاند‌ن (ئافراندن)، دحاله‌کی دا ئه‌و چێکرن کو ژ طاعه‌ت و گوهدانا وان بێ ئحتیاج و ژ به‌ر نه‌گوهداری یا وان ل ئێمناهی یێ دا بی. چکو راستی ئه‌ڤه‌ کو نه‌گوهداری یا نه‌گوهداران چ زه‌ره‌رێ ناگهێنی یێ و گوهدان و طاعه‌تێ گوهداران ژی چ مه‌نفیعه‌ت و سوودێ لێ ناکێ. ڤێجا رزقێ ژیانا وان لناڤ وان دا بلاڤ کر و ل دنیایێ دا [جهێ هه‌ر یێکی کفش کر و] هه‌ر که‌س دانی سه‌ر جهێ وی. ڤێجا ئه‌هلێ سه‌راتی و باشی یان د دنیایێ دا، هه‌ما خودان ته‌قوا نه‌؛ خه‌به‌ردانا وان دورست و سه‌راست، به‌ر کرن و جل و به‌رگێ وان ناڤنجی و رێچک و رابوون رونشتنا وان هه‌ڤرێ یه‌ دگه‌ل ته‌وازووع و خوه‌ شکاندنێ. حه‌چی یا خودێ لسه‌ر وان حه‌رام کری، چاڤێ خوه‌ ژێ دگرن و گوهێ خوه‌ ژ وێ چه‌ندێ را دانینه‌ (وه‌قف کرنه‌) کو پێ وێ زانینا فه‌یدا وان تێدا هه‌یی بده‌ستڤه‌ بینن، رووژێن به‌لا و زه‌حمه‌تێ ژ بوونا وان وه‌ک رووژێن رحه‌تی و به‌رفره‌هی یێ نه‌. ئه‌گه‌ر نه‌ ئه‌و موده‌تێ عه‌مر (ته‌مه‌ن) بیا کو خودێ ژ وان را دانیه‌، ژ به‌ر شه‌وقا گرتنا کریا قه‌نج و طرسا ژ عه‌زاب، قاس چاڤ نوقاندنه‌کی جانێ وان د به‌ده‌نا وان دا نه‌دسه‌کنی؛ خودێ د چاڤێ وان دا مه‌زنه‌، ڤێجا ژ به‌ر وێ خێنجی وی لبه‌ر چاڤێ وان بچووکه‌؛ ژ بهشتێ را وه‌ك وا كه‌سانه‌ ئه‌وێن حه‌چوه‌کو بھشت د‌یتین و د ناڤا نعمه‌ت و خوه‌شی یێن وێ د‌ا مایین، ژ ئاگرێ جه‌هنه‌مێ را وصانن، و‌ه‌ك وایێن حه‌چوه‌کو ئه‌و دیتین و د ناڤا عه‌زابێ وێ دا. دلێ وان خه‌مداره‌ و خه‌لک ژ زه‌ره‌ر گهاندنا وان ل ئێمناهی و ئه‌مانێ دا نه‌. به‌ده‌نا وان زه‌عێف و لاواز و ئحتیاجی یا وان کێم و نه‌فسا وان ب عفه‌ت و پاقژه‌. چه‌ند رووژه‌ک کورت خوه‌ رادگرن و صه‌برێ دکن کو دپه‌ی دا ژ وان را رحه‌تیه‌ک درێژ و به‌رده‌وام هه‌بێ، ئه‌ڤ مه‌عه‌مله‌ت و تجاره‌تا پر سوود‌ و ب فه‌ید‌ه‌ ئه‌و کو خودایێ وان ژ بوونا وان هێسان کریه‌‌. دنیایێ قه‌ستا وان کریه‌ و ئه‌و وێ ناخازن و، ئه‌وێ ئه‌و ئه‌سیر کرنه‌ لێ ئه‌و جانێ خوه‌ دکن فدیه‌ و ددن و خوه‌ ژ ئه‌سیری یێ خلاس د‌کن.

هندیکه‌ د شه‌ڤێ دا، ئه‌و ژ پێڤه‌ نه‌ (راوه‌ستانه‌ و مژوولێ نمێژێ نه‌) و پچ پچێن قورئانێ دخوونن، ئه‌وێ دخوونن و ب ته‌رتیل [هێدی هێدی و ب فکر] دخوونن. ل ده‌مێ خوه‌ندنێ دا خوه‌ پێ وێ خه‌مدار دکن و ل ده‌رمان کرنا ده‌ردێ خوه‌ دگه‌رن. ڤێجا ده‌ما بگهێن ئایه‌ته‌کی کو بشاره‌ت و مزگینی تێدا یه‌، لێ دسه‌کنن و لێ طما د‌بن و دلێ وان بشه‌وق دفرژیێ و خوه‌شی یان تینن به‌ر چاڤێ خوه‌. و ده‌ما بگهێن ئایه‌ته‌کی کو طرساندن تێدا هه‌یه‌، گوهێ دل بئالیێ وێڤه‌ ددن و وه‌ره‌نگ حه‌ساب دکن کو قێر و ده‌نگێ فوورینا جه‌هنه‌مێ د گوهێ وان دا یه.‌ ڤێجا [ب شکلێ روکووعێ] طه‌واندی نه‌؛ ئه‌هنی و که‌فا ده‌ستا و چووک و سه‌رتلی ب عه‌ردێڤه‌ دانینه‌ و ئازاد کرنا خوه‌ ژ خودێ دخازن.

برووژڤه‌ ژی ئه‌و نه‌رم و حه‌لیم و زانا و قه‌نجکار و ب ته‌قوا نه‌، کو طرسا ژ خودێ وصا ئه‌و زراڤ کرنه‌ وه‌ک چه‌وا پێ تراشینێ تیر زراڤ دبێ، ئه‌وێ به‌رێ خوه‌ بدێ وان ئه‌وا نه‌خوه‌ش (نه‌ساخ) حه‌ساب دکێ، حالحاله‌ ئه‌و قه‌ نه‌خوه‌ش نینن؛ و دبێژێ: عه‌قلێ وان تێک چوویه‌!!

حه‌قیقه‌ت ئه‌ڤه‌ کو کاره‌ک مه‌زن، وه‌زع و حالێ وان تێک دایه‌، ئه‌و ب عه‌مه‌لێ خوه‌ یێ کێم رازی نینن و عه‌مه‌ل و کارێ خوه‌ یێ زه‌حفی، پر نزانن، ڤێجا ئه‌و لبال خوه‌ لبن ئتهامی دا نه‌ و ژ کریارێن خوه‌ دطرسن؛ ده‌ما بقه‌نجی په‌صنێ یێک ژ وان بێ دایین ژ وێ یا ده‌رحه‌ق وی دا هاتی گووتن دطرسهێ و دبێژێ: ئه‌ز باشتر ژ هه‌رکه‌سی خوه‌ ناس دکم و ب خوه‌ دزانم و خودایێ من ژی ژ من پتر ئاگاهی و زانین ده‌رحه‌ق من دا هه‌یه‌، ئه‌ی خودا، ژ به‌ر وێ یا ئه‌و دبێژن، لمن نه‌گره‌ و من باشتر بکه‌ ژ وێ یا ئه‌و گومان دکن و لمن ببووره‌ و عه‌فوو بکه‌ وێ یا ئه‌و پێ نزانن.

ژ نیشانێن ھه‌ر یێك ژ وان ئه‌ڤه‌ کو: تو دبینی ئه‌و د کارێ دینی دا بهێز و ژێهاتی یه‌ و دگه‌ل وێ چه‌ندێ کو های ژ خوه‌ مایی یه‌، نه‌رمه‌ و ئیمانا وی هه‌ڤرێ یه‌ دگه‌ل یه‌قینێ، ژ علم و زانینێ را کولبووه‌ و علمێ وی هه‌ڤرێ دگه‌ل حلم و نه‌رمی یێ یه‌، دگه‌ل ده‌وله‌مه‌ندی یێ مه‌صره‌فا وی ناڤنجی یه‌ (قوتیتی یه‌)، د عباده‌ت دا ئه‌هلێ خوشووعێ یه‌، ل نه‌داری یێ دا ژی لهه‌ڤکه‌تی و سپه‌حی یه‌ و ل وه‌ختێ دژواری یێ دا صه‌برداره‌ و په‌یکه‌تنا وی ل مالێ حه‌لال دا یه‌ و ژ هدایه‌ت بوونێ را بکه‌یف و نه‌شاطه‌ و ژ طماهی یێ دووره‌. ل حالێ کرنا کارێ قه‌نج و باش دا ژی ل ناڤ طرسێ دا یه‌، خه‌ما وی شوکر کرنه‌ حه‌تا لێ دبێ شه‌ڤ و خه‌ما وی زکر کرنه‌ حه‌تا لێ دبێ صبه‌ھ. ب طرس، شه‌ڤا خوه‌ دبێ سه‌ری و بکه‌یفخوه‌شی لێ دبێ صبه‌ھ. طرسا وی ژ وێ غه‌فله‌تێ یه‌ کو نه‌وه‌بێ بسه‌ردا بگرێ و که‌یفا وی ژ به‌ر وێ ره‌حمه‌ت و فه‌زلا خودێ یه‌ کو گهایی یێ.

ئه‌گه‌ر نه‌فسا وی ژ کرنا کارێ کو لێ نه‌خوه‌ش تێ را نه‌گوهداری یا وی بکێ، ئه‌وێ مه‌حرووم و بێ به‌هر دکێ ژ وێ یا ئه‌و حه‌ژێ دکێ، حه‌ز کرنا وی د وێ دا یه‌ ئه‌وا ژ ناڤ ناچی و خوه‌ ڤه‌ده‌ره‌ ژ وێ یا نه‌به‌رده‌وام و نامینێ. نه‌رمی یێ تێکله‌ل علم و زانینێ دکێ و گووتن و عه‌مه‌ل دگه‌ل هه‌ڤ رێک تێخێ. تو ئه‌وی دبینی کو هێڤی کورت و کێم شمتینه‌، دلێ وی خاشعه‌ و نه‌فسا وی قانع، خارنا وی کێمه‌ و کارێ وی رحه‌ت و هێسان، دینێ وی پارازتی یه‌ و شه‌هوه‌تا وی مری یه‌ و عه‌رن و غه‌زه‌با وی داکه‌تی یه‌. هێڤیا خێر و باشی یێ ژێ هه‌یه‌ و مرووڤ ژ خرابی گه‌هاندنا وی ل ئێمناهی یێ دا یه‌.

ئه‌گه‌ر لناڤ کووما غافلان دا بێ لناڤ زاکران دا تێ نڤیسین و ئه‌گه‌ر لناڤ زاکران دا بێ، ژ غافلان نایێ نڤیسین. وی یێ زولم لێ کری عه‌فوو دکێ و دانێ دکێ دگه‌ل وی یێ ئه‌و بێ به‌هر کری، گرێدانێ چێدکێ دگه‌ل وی یێ ژێ بریی. پیس ئاخفتن ژ وی دویره‌ و خه‌به‌ردانا وی نه‌رمه‌ و کارێ کووتی و نه‌حه‌ز لبال وی په‌یدا نابێ و باشی ئله‌ھ دگه‌له‌، خێر و باشی یا وی به‌رێ خوه‌ دایه‌ و خرابی یا وی پشت دایه‌.

د وه‌ختێ دژواری یێن هه‌ژاندنکه‌ر دا ب وه‌قاره‌ و ناهه‌ژهێ، د نه‌خوه‌شی یا دا پر صه‌برداره‌ و ل وه‌ختێ رحه‌تی یێ و به‌رفره‌هی یێ دا پر شوکرداره‌، زولمێ ناکێ ل وی که‌سێ که‌ربێ وی ژ هاتی و خوه‌ گونه‌ھکار ناکێ ژ به‌ر وی یێ حه‌ژێ دکێ، حه‌قی یێ دبێژێ هێژ شه‌هده‌یی لسه‌ر نه‌هاتی دایین، ئه‌وا دایینێ کو بپارێزێ ئه‌وێ ژ ناڤ نابێ، ئه‌وا ژێ خوه‌ستین کو ل بیرا خوه‌ دا بهێلێ ژ بیر ناکێ و پێ ناڤ و له‌قه‌بێن نه‌باش گازی خه‌لکێ ناکێ، زه‌ره‌رێ ناگهێنێ جیرانێ خوه‌ و ل وه‌ختێ موصیبه‌ت و به‌لایێ دا (شه‌ماته‌تێ و) لوومان ناکێ و که‌یفا خوه‌ ناینێ، قه‌ت ناکه‌ڤێ ناڤ کارێ باطل و پووچه‌ک دا و ژ حه‌قی یێ ده‌رناکه‌ڤێ.

ئه‌گه‌ر بێ ده‌نگ ببێ بێ ده‌نگی یا وی ئه‌وی خه‌مدار ناکێ و ئه‌گه‌ر بکه‌نێ ده‌نگێ خوه‌ بلند ناکێ و ئه‌گه‌ر نه‌حه‌قیه‌ک دگه‌ل بێ کرن [د جی دا توولێ ناگرێ] صه‌بر دکێ حه‌تا خودێ توولا وی بگرێ (حه‌یفا وی ھلد‌ێ). نه‌فسا وی ژ به‌ر وی‌ ل زه‌حمه‌تێ د‌ا یه‌ و خه‌لك ژ به‌ر وی د‌ رحه‌تی یێ د‌ا نه‌؛ ئه‌و خوه‌ ژ ئاخره‌تا خوه‌ را د‌‌د‌ێ زه‌حمه‌تێ و خه‌لکێ رحه‌ت دهێلێ. دوور بوونا وی ژ که‌سێ کو خوه‌ ژێ دوور دگرێ ژ به‌ر زوهد و پاکی یێ یه‌، و خوه‌ نێزیکێ کی بکێ، ژ به‌ر خوه‌ش ئه‌خلاقی و دلووڤانی یا وی یه‌. نه‌ خوه‌ دوور گرتنا وی ژ به‌ر کبر و خوه‌ مه‌زن کرنێ یه‌ و نه‌ ژی نێزیک بوونا وی ژ بوونا حیله‌ و خاپاندنێ یه‌.

راوی دبێژێ: ڤێجا هه‌مام قێره‌ک دا و جان ژ به‌ده‌نا وی ده‌رکه‌ت. میرێ باوه‌رداران ژی که‌ره‌م کر: ئها، ولاهی طرسا من ده‌رحه‌ق وی دا ژ ڤێ یێکێ بی. د په‌ی را گووت: شیره‌تێن به‌لیغ دگه‌ل ئه‌هلێ خوه‌، ئها، وها دکێ! ڤێجا که‌سه‌کی گووتێ: تو چه‌وا؟ ئه‌ی ئه‌میره‌لموئمنین! چره‌ وه‌ل ته‌ نه‌کر؟ که‌ره‌م کر (س): وه‌ی، ژ ته‌را! مرنا هه‌رکه‌سی وه‌خته‌ک ژێرا هه‌یه‌ کو ژ وێ ده‌رباز ناکێ و سه‌به‌به‌ک هه‌یه‌ کو ژ وێ ده‌رناکه‌ڤێ. ژ ڤان ئاخفتنا نه‌که‌ کو ئه‌ڤاهه‌ پف کرنا شه‌یطانه‌ لسه‌ر زمانێ ته‌ (شه‌یطان ئه‌ڤا گووتنا بته‌ ددێ گووتن).

نظرات

ارسال نظر

* فیلدهای ستاره دار حتما بایستی مقدار داشته باشند.