۞ ئاخفتنا 198 ۞

۞ ئاخفتنا 198 ۞

علمێ خودێ: ئه‌و ب قێرقێرا حه‌یوانان ل چوولان و بێ ئه‌مری یا به‌نده‌یان ل خه‌لوه‌تگه‌ھا د‌ا (وه‌ختێ تنێتی یێ) و هات و چووا ماسی یان ل به‌حرێن کویر و سه‌رهه‌ڤدا هاتنا ئاڤێ لبه‌ر بایێن دژوار، زانێ (ئاگاھی ژێ ھه‌یه‌). و ئه‌ز شه‌هده‌ ددم کو موحه‌ممه‌د صه‌لات و سه‌لامێن خود‌ێ لسه‌ر وی و ئالێ وی بن بژارتی یێ خودا‌ و ئینه‌رێ وه‌حی و ره‌حمه‌تا وی یه‌.

شیره‌تا ته‌قواتی یێ: أما بعد، ڤێجا ئه‌ز وه‌صیه‌ت و شیره‌تا ته‌قواتی یا خودێ ل هه‌وه‌ دکم، ئه‌وێ ده‌س ئاڤێتی چێکرنا هه‌وه‌ و، زڤرینا هه‌وه‌ بئالیێ ویڤه‌ و پێک هاتنا ئحتیاجی یێن هه‌وه‌ ژی ب وی یه‌؛ و‌ ئاخریکا خوه‌ست و ڤیانێن هه‌وه‌ و رێکا راستا هه‌وه‌ بال وی ڤه‌یه؛‌ و ل وه‌ختێ طرس و ده‌هشه‌تێ جهێ هه‌وار و خوه‌ پێ گرتنا هه‌وه‌یه‌. راستی ئه‌ڤه‌ کو ته‌قواتی یا خودێ ده‌رمانێ ده‌ردێ دلێن هه‌وه‌ و رووناهی یا طاریتی یا قه‌لبێن هه‌وه‌ یه‌؛ شفایه‌ ژ نه‌خوه‌شی یا به‌ده‌نا هه‌وه‌ ره‌ و دورستکه‌رێ خرابی یا دلێ هه‌وه‌ یه‌. ئه‌و پاک که‌رێ قرێژا رحێ هه‌وه‌ و بیناکه‌رێ چاڤێ هه‌وه‌ یێ نابینێ و ئێمناهی یا ژ طرس و ده‌هشه‌تا هه‌وه‌ و رووناهی یا ره‌شاتی یا طاریتی یا هه‌وه‌ یه‌. ڤێجا نخوه‌ هوون طاعه‌ت و گوهدانا خودێ ژ خوه‌ ره‌ بکن جل و لباسێ بنڤه‌، نه‌ کو لباسێ سه‌رڤه‌ (نه‌ سه‌راسه‌را)، به‌لکی ئه‌وێ بکن ناڤ رحێ خوه‌ را و لبن پراسی یێن خوه‌ دا ئه‌وی جی بجی بکن، ئه‌وێ بکن سه‌رووک و سه‌ر کار و بارێ خوه‌ را ده‌ینن، بلا ئه‌و سه‌رکانی یا هه‌وه‌ بێ ژ وه‌ختێ تێهنیتی یێ را و بلا مه‌هده‌رکارێ هه‌وه‌ بێ ژ گهانا خوه‌ستا هه‌وه‌ را، بلا مه‌رطالێ هه‌وه‌ بێ ژ رووژا طرسا هه‌وه‌ را، ئه‌وێ ژ خوه‌ را بکن چرایا لناڤ گوورا خوه‌ دا و رحه‌تکه‌رێ خوه‌ ل درێژیا ده‌هشه‌تا خوه‌ دا و ئه‌وێ ژ خوه‌ را بکن دل فره‌هی ل جهێ سه‌کنا خوه‌ دا.

چکو راستی ئه‌ڤه‌ کو طاعه‌ت و گوهدانا خودێ مرووڤ دپارێزێ ژ جهێ ته‌له‌ف بوون و ژ ناڤچوونێ؛ و ژ وا جهێن طرسێ کو لسه‌ر رێکا وی یه‌ و ژ گه‌رمیا ئاگرێ ب گوڕی و ب پێت خلاس دکێ.

ڤێجا که‌سێ خوه‌ ب ته‌قوایێ بگرێ وێ زه‌حمه‌تی یێن ژێرا نێزیک بوویین دوور ببن، وێ ته‌حلی ژێرا شیرین ببن و پێلێن به‌لا کو دوورا وی گرتنه‌ وێ خوه‌ ژێ بد‌ن ئالی و دوورا وی ڤه‌کن و دژواری وێ ژێره‌ بزڤرن سه‌ر رحه‌تی یێ و بارانا ره‌حمه‌تا ئلاهی کو ژێ هاتبی برین وێ ژ نووڤه‌ ببارێ و ره‌حمه‌تا حه‌ق کو ژێ ره‌ڤی بێ وێ به‌رێ خوه‌ بدیێ و سه‌رکانیێن نعمه‌تێ کو چک ببوون وێ بهه‌رکن و به‌ره‌که‌ت کو پچو پچو (كێم كێم) دهاتا وێ بووش (زه‌حف-پر-گه‌له‌ك-زێد‌ه‌) ببێ و وه‌ک بارانا لب مه‌زن سه‌ر وی دا ببارێ. ڤێجا نخوه‌ بطرسن ژ وی خودایێ پێ وه‌عز و شیره‌تان مه‌نفیعه‌ت دایی هه‌وه‌ و ب رێکا پێغه‌مبه‌رێن خوه‌ ڤه‌ هوون شیره‌ت کرین و نعمه‌ت و قه‌نجی یێن زه‌حفی دایین هه‌وه‌، نخوه‌ هوون ژی ل عباده‌ت کرنێ دا ژ بوونا وی خوه‌ بشکینن و پێ بجی ئانینا ب حه‌قی یا طاعه‌ت و گوهدانا وی ب ئالیێ ویڤه‌ هه‌رن.

سه‌راتی یا ئسلامه‌تی یێ: پاش وێ ژی، براستی ئه‌ڤ ئسلام ئه‌و دینێ خودێ یێ وه‌ره‌نگه‌ کو ژ خوه‌ را بژارت و بشکله‌ک تایبه‌ت ئه‌و سه‌راست کر و باشترین خه‌لقێ خوه‌ ژ راگه‌هاندن و ته‌بلیغا وێ را ئختیار کر و ستوونێن وێ لسه‌ر حه‌ژێکرنا خوه‌ راگرت. و ب قووه‌ت و عززه‌تا وێ دینێن دی بن ئێخستن و ب بلند کرنا وێ رێچکێن (رێبازێن) دی نڤز کرن و پێ بهادانا وێ دوژمنێن وێ بێ چنه‌ (ته‌حقیر و كێم) کرن و پێ پشتیڤانی یا ژ وێ دژ و زددێن وێ بێ که‌س کرن، پێ قه‌وی کرنا ستوونا وێ خیمێ ل رێ وندا بوونێ ئێخست و تێهنی ژ حه‌وزێ وێ تێر ئاڤ کرن و حه‌وزێن وێ ژ بوونا ئاڤبه‌ران ته‌ژی کر، پاشێ ژی ئه‌و وصا قاییم کر کو هه‌چکێ وێ نه‌یێ شکاندن و حه‌لقێن وێ نه‌یێن ڤه‌کرن و ئه‌ساسێ وێ ژ ناڤ نه‌چێ و خراب نه‌بێ و ستوونێن وێ نه‌که‌ڤن و دارا وێ ژ ره‌ھ ڤه‌ هلنه‌بێ و زه‌مانێ وێ خلاس نه‌بێ و قانوونێن وێ که‌ڤن و پووچ نه‌بن و چقێن وێ نه‌یێن بڕین و رێکێن وێ طه‌نگ نه‌بن و د‌اكه‌تن و پێڤه‌چوونا ده‌شتێن وێ یێن خوه‌ش ب زه‌حمه‌ت نه‌که‌ڤن و ره‌شاتی ژ رووناهی یا وێ را نه‌بێ و راستی یا وێ خوه‌هری نه‌که‌فتێ و دارا وێ یا راست خوه‌هر نه‌بێ و چوونا لسه‌ر رێکێن وێ یێن فره‌ھ زه‌حمه‌ت نه‌بێ و چرایێن وێ یێن رووناهی طه‌مراندن ژێرا نه‌بێ و شیرینی یا وێ بئالیێ ته‌حلی یێ ڤه‌ نه‌چێ. ئسلام ئه‌و ستوونن کو ئه‌صلێ وان د ناڤ حه‌قی یێ دا هاتنه‌ جی کرن و خیمێ وان هاتنه‌ قاییم کرن و سه‌رکانینه‌ کو کانیێن وێ ئاڤ د سه‌ر دا درژن و ئه‌و چرانه‌ کو پێتا وان بلند‌ و ئه‌و نیشانن کو رێونگی یێن وێ ب وان، رێکا خوه‌ په‌یدا دکن و دبینن و عه‌لامه‌تن کو ژ بوونا ل رێ خه‌له‌ت بوویان هاتنه‌ ڤه‌دان. سه‌ر ئاڤن (كانی نه‌) كو که‌سێن بچن سه‌ر تێرئاڤ د‌بن.خودێ خلاسه‌کا رازی بوونا خوه‌ و بلندترین جهێ ستوونێن ئه‌دیانێن خوه‌ ل ناڤ وێ دا ده‌ینایه‌ و سه‌راترین مه‌رته‌با طاعه‌تێ خوه‌ د په‌یره‌ویا وێ دا ده‌ینایه‌. ڤێجا ئه‌و ل بال خودێ ستوون قاییم و بلند ئاڤاهی و ده‌لیل رووناهی و چرا گه‌ش و قودره‌تا سه‌رکه‌تی یه‌، ئه‌و نیشان بلنده‌ و که‌س نکارێ دگه‌ل وێ به‌رابه‌ری یێ بکێ،ڤێجا نخوه‌ پێ وێ خوه‌ بقه‌در و قیمه‌ت بێخن وبکه‌ڤن په‌ی و حه‌قێ وێ ئه‌دا بکن و ئه‌وێ ل جهێ وێ دا ده‌ینن.

به‌حسا پێغه‌مبه‌ر (ص): خودایێ سوبحان موحه‌ممه‌د صه‌لات و سه‌لامێن خود‌ێ لسه‌ر وی و ئالێ وی بن بحه‌ق ژ بوونا پێغه‌مبه‌ری یێ رێکر ل زه‌مانه‌کی دا کو دنیا نێزیکێ خلاسه‌کا وه‌ختێ خوه‌ بوویی و ئاخره‌تێ به‌ر، دایی و ره‌وش و برقێنا د‌نیایێ پاش رووناهیێ به‌رێ خوه‌ دایی طاریتی یێ و ئه‌ھلێ خوه‌ ئێخستی شه‌ر و نه‌ره‌حه‌تی یێ و جهێ وا یێ ئه‌من و رحه‌ت که‌تی نه‌خوه‌شی یێ و دنیا به‌ره‌و خراب بوون چوویی و عه‌مرێ وێ خلاس بوویی و نیشانێن ژ ناڤ چوونا وێ خوه‌یهایین و ژ خه‌لکێ بریی و حه‌لقێن په‌یوه‌ندا وان ڤه‌بیین و سه‌به‌بێن ته‌ڤهه‌ڤ بوونا وێ پر بوویی و ده‌وسا خلاسی یێ نه‌په‌یدا و عه‌یبێن وێ ئه‌شکه‌ره‌ وزه‌مانێ عه‌مرێ وێ یێ درێژ کورت بوویی. ل ڤی وه‌ختی دا خودێ رساله‌تا خوه‌ ژ وی را ته‌بلیغ کر و راگه‌هاند دا کو قه‌در و قیمه‌ت و بلند مه‌رته‌به‌تی یێ بدێ ئوممه‌تا خوه‌ و خه‌لکێ زه‌مانێ خوه‌ بگهێنێ بهارا ژیانێ و یار و هه‌ڤالێن خوه‌ سه‌ر بلند بکێ و شه‌ره‌ف و مه‌زناهی یێ بدێ ئاریکارێن خوه‌.

قورئانا پیرووز: پاشێ ڤێجا کتێبه‌ک ژێرا شاند؛ نووره‌ک کو چرایێن وێ ناطه‌فن؛ چرایه‌ک کو ژ رووناهی یا وێ کێم نابێ؛ به‌حره‌ک کو کووراتی یا وێ نایێ زانین؛ رێکه‌ک کو رێونگییێ خوه‌ وند‌ا (به‌رزه‌) ناکێ؛ رووناهیه‌ک کو رووناهی یا وێ طاری نابێ؛ فورقان و ژ هه‌ڤ جداکه‌ره‌ک کو بورهان و ده‌لیلا وێ نایێ ڤه‌مراندن؛ ئاڤاهیه‌ک کو ستوونێن وێ ویران نابن و ده‌رمانه‌ک کو د وێ دا طرسا نه‌خوه‌شی یێ نینه‌ و سه‌رکه‌تنه‌ک کو هه‌ڤالێن وێ نایێن شکاندن و حه‌قه‌ک کو ئاریکارێن وی بن ناکه‌ڤن و زه‌لیل نابن. ئه‌و مه‌عده‌نا ئیمانێ و مه‌ركه‌زا وێ‌ یه‌، سه‌رکانی و به‌حرێن علم و زانینێ یه‌، باغ و بووستانێ عه‌داله‌تێ یه‌ و حه‌وزێ وێ، خیم و ئه‌ساسێ ئسلامێ یه‌ و نه‌والێن (د‌وول-گه‌لی) یێ حه‌قی یێ یه‌ و مێرگێن وێ. ئه‌و به‌حره‌که‌ کو ئاڤ کێش نکارن ڤاله‌ بکن، سه‌رکانی نه‌ کو ئاڤبه‌ر ئاڤا وان خلاس ناكن، سه‌ر ئاڤێن وه‌ره‌نگن‌ کو چقاس ئاڤێ ژێ ڤه‌خون ئاڤا وێ کێم نابێ، ئه‌و جهن، کو رێونگی رێکا وا وندا ناکن، ئه‌و نیشانن، کو ژ به‌ر چاڤان نایێن ڤه‌شارتن و گرکێن [خوه‌ش روونشتنن] ئه‌وێن قه‌ستا وا بکن ژ وان ده‌رباز نابن.

خودێ ئه‌و [قورئان] کر ژ ناڤبه‌را تێهنیشکا عالمان و بهارا دلێ په‌یکه‌تێن فێهم کرنا حه‌قیقه‌تان و مه‌قصه‌د و مه‌قصوودا صالحان. ده‌رمانه‌ک کو پاش وێ ده‌رده‌ک نه‌مینێ، رووناهیه‌ک کو طاریتی دگه‌ل نینه‌، وه‌ریسه‌ک کو هه‌چکێ وێ قه‌وی یه‌، په‌ناهگه‌هه‌ک بلند و قاییم و، سه‌رکه‌تن بو حه‌چی که‌سێ ئه‌وێ بکێ مه‌زنێ خوه‌ و، ئه‌من و سه‌لامه‌تی ژ بوونا که‌سێ بکه‌ڤێ د ناڤ دا و، هدایه‌ت بو وی که‌سێ بکه‌ڤێ په‌ی و، عوزرخاز بو که‌سێ خوه‌ نسبه‌ت بدێ بال وێڤه‌ و، بوورهان و ده‌لیل بو که‌سێ ب وێ بئاخڤێ و، شاهد بو که‌سێ ل به‌رابه‌رێ د‌وژمنێ خوه‌ د‌ا خوه‌ ب وێ بگرێ و، سه‌رکه‌تن بو وی یێ ئه‌وێ ژ خوه‌ را بکێ ده‌لیل، و راگرێ وی که‌سێ راگرێ وێ، هلگرێ وی که‌سێ ئه‌وێ بکار ببێ و پێ عه‌مه‌ل بکێ و، نیشان بو که‌سێ ئه‌وێ ژ خوه‌ را بکێ نیشان و، مه‌رطال و سپه‌ر ژ بوونا که‌سێ خوه‌ بدێ به‌ر وێ و، زانین بو که‌سێ ئه‌وێ [ل مه‌ژی و زھنێ خوه‌ دا راگرێ] بپارێزێ و، حه‌دیس بو وی یێ ژێ بئاخڤێ و روایه‌ت بکێ و، حوکمه‌ ژ بو وی که‌سێ حوکمێ پێ بکێ.

نظرات

ارسال نظر

* فیلدهای ستاره دار حتما بایستی مقدار داشته باشند.